Ótken jyly bazalyq zeinetaqynyń jańa formaty engizilgen, sonyń arqasynda búgingi kúni ortasha zeinetaqy 85 785 teńgeni quraýda. Bul týraly QR Eńbek jáne halyqty áleýmettik qorǵaý ministri Berdibek Saparbaev aitty, dep habarlaidy Baq.kz agenttigi.
Jiyn barysynda ministr halyqqa áleýmettik kómekter kórsetile beretindigin aityp ótti.
«3 mln-nan astam adam, oǵan qosymsha áleýmettik qamsyzdandyrý qorynan da 800 myńǵa jýyq qazaqstandyqtar bar, olardyń barlyǵyna 190 mlrd teńge bólinedi. Osy kómekti naqty adamdarǵa berý úshin áleýmettik kartany daiyndap jatyrmyz. Ol jóninde buǵan deiin aitqanbyz. Qazir ol 97 paiyz oryndaldy, shildeniń birine deiin ony 100 paiyz oryndaimyz», - dedi ol.
Sonymen qatar, ol zeinetaqy máselesine toqtalyp, ótken jyly bazalyq zeinetaqynyń jańa formaty engizilgenin aitty.
«Sonyń arqasynda búgingi kúni ortasha zeinetaqy 85 785 teńgeni quraýda. Biz qazir jinaqtaý zeinetaqysyn damytý ústindemiz. Qazir halyq jalaqysynyń 10% zeinetaqyǵa aýdaryp otyrsa, kelesi jyldan bastap jumys berýshi qosymsha taǵy 5% aýdarady. Sonda aiyna zeinetaqyǵa 15 paiyz aýdarylyp otyrady», - dedi ministr.
Sóz arasynda ol, prezidenttiń alǵa qoiǵan basty máselese jurtshylyqty jumyspen qamtý bolyp otyrǵanyn jáne ol úshin elimizde «Eńbek» memlekettik baǵdarlamasy iske asyrylyp jatqanyn jetkizdi.
«Osy baǵdarlama aiasynda jylyna kem degende 530 myń otandasymyzdy jumyspen qamtýymyz kerek. Oǵan biylǵy jylǵa 124 million teńge bólingen. Elbasy biyl «Jastar jyly» dep jariialaǵanyn bilesizder, soǵan bailanysty biz osy baǵdarlamaǵa eki jańa baǵyt engizdik. Bireýi jas maman, ekinshisi jas kásipker. Ondaǵy maqsatymyz qazirgi ekonomikanyń talaptaryna sai mamandardy daiyndaý. Odan ary qarai Bastaý biznes baǵdarlamasyn jalǵastyrýymyz kerek. Granttar men shaǵyn nesieni kóbeitýimiz qajet», - dedi Berdibek Saparbaev.
