Osy jyldyń qazanynda Qazaqstanda dári-dármek, emdeýge arnalǵan quraldar-jabdyqtar men apparatýralar 1 aidyń ishinde 0,4, al jyl ishinde 2,4 paiyzǵa qymbattady, dep habarlaidy QazAqparat tilshisi Ranking.kz resýrsyna silteme jasap.
Sektordaǵy ai ishinde oryn alǵan eń joǵary ósimi Almaty (1,7 paiyz), Qostanai (1,5) jáne Túrkistan oblystarynda (1) baiqalady.
Al jyldyq qarqynda qymbatshylyqty Aqmola men Mańǵystaý oblystarynyń (8,1 paiyz), Nur-Sultan qalasynyń (7) turǵyndary sezindi.
Baǵanyń jyldyq ósimi elimizdiń 17 óńiriniń 16-synda baiqalady. Tek Aqtóbe oblysynda ǵana baǵanyń 1,8 paiyzǵa tómendeýi tirkelgen.
QR Strategiialyq josparlaý jáne reformalar agenttigine qarasty Ulttyq statistika biýrosynyń monitoringine kiretin dárilik zattardyń ishinde 30 ml-lik «Hilak forte» baǵasy birden 20,3 paiyzǵa qymbattap, 1,6 myń teńgege jetken.
Al 125 ml-lik «Akvalor» 9,8 paiyzǵa ósip, 2 myń teńgege, ishinde 100 dári bar 40 mg-dyq «No-shpa» 9 paiyzǵa artyp, 2,7 myń teńgege, 30 kapsýlalyq «Essentsiale forte N» 8,2 paiyzǵa qymbattap, 2,9 myń teńgege, jótelge arnalǵan 100 ml-lik «Bronhikým-S» shárbaty 7,3 paiyzǵa artyp, 1,5 myń teńgege deiin ósken.
Sonymen qatar paratsetamol, azitromitsin, «Gipotiazid», «Veroshpiron» syndy dárilerdiń arzandaǵany baiqalady.
