Halyqty kógildir otynmen qamtamasyz etý - áleýmettik mańyzy zor másele. Bul jaiynda Elbasy Nursultan Ábishuly Nazarbaev halyqqa joldaýlarynda jii aityp keledi. Ásirese naýryz aiyndaǵy bes bastama úndeýinde eldi gazben qamtamasyz etýdi jalǵastyrý jaiyn basa aitty.
Kúni keshe Astana qalasyndaǵy "Indýstriialandyrýdyń ekinshi besjyldyǵy: Qazaqstanda jasalǵan" atty jalpyulttyq telekópir kezinde Memleket basshysy "Saryarqa" gaz qubyrynyń qurylysyn bastaýǵa pármen berdi. Bul joba aiaqtalǵanda el ortalyǵy men soltústik óńirlerdegi 171 eldi mekenge kógildir otyn jetedi. Qazirgi tańda elimizdiń ózge aimaqtarynda da gazdandyrý deńgeii jańa beleske kóterilip, jandanyp keledi. Atap aitar bolsaq, búgin Astanadaǵy Ortalyq kommýnikatsiialar qyzmetinde ótken brifingte Almaty oblysynyń ákimi Amandyq Batalov óńirdegi gazdandyrý deńgeii jyl sońyna deiin 30 %-dan asatynyn tilge tiek etti.
Almaty oblysy boiynsha gazdandyrý Taldyqorǵan qalasynda qalaishilik júielerdi júrgizýdiń qurylysy jalǵasýda eken. Tekeli qalasyna deiingi gaz qubyry iske qosylǵan. Baqanas, Úshtóbe men Saryózekte jetkizgish gaz qubyrlary bar 3 AGBS-tyń qurylysy bastalǵan. Jalpy oblysta gazdandyrý jumysy 14 aýdanda júrip jatyr. Al taratýshy gaz júiesiniń qurylysy jeke investitsiia esebinen júrgizilýde eken.
Óńirdi gazdandyrý jumystaryna biyl biýdjetten 9,6 milliard teńge bólingen. Al 36 milliard teńge jeke investitsiia boiynsha tartylǵan. Iaǵni biýdjet qarjysynyń 1 teńgesine jeke qarajattyń 3 teńgesi sáikes keledi. Jospar boiynsha jyl sońyna deiin Almaty oblysynda kógildir otyn jetken eldimekenderdiń sany 142-ge jetedi. Muny baǵamdap qarar bolsaq 30%-dan asady.
Aimaqtar men óńirlerdi gazben qamtamasyz etý aldymen halyq igiligi úshin, ekinshiden ekologiiaǵa da paidasy zor. Elbasy bes bastamasynda: "Ekologiia jaqsarady. Gazǵa kóshý tek Astananyń ózinde ziiandy qaldyqtardyń aýaǵa taralýyn 6 esege nemese jylyna 35 myń tonnaǵa azaitady" - degen bolatyn. Bul degenimiz - ekologiiany jaqsartýdyń bir joly da.
Qazaqstan gaz óndirý kólemin 8 milliard tekshe metrden bastap, táýelsizdik jyldarynda bul kórsetkishti 52 milliard tekshe metrge deiin arttyrdy. Qazir el turǵyndarynyń gazben qamtylý deńgeii 47,38%-dy quraidy. Bul degenimiz 8,5 million turǵyn gazben qamtylǵan. Aǵymdaǵy jyly memleket tarapynan gazdandyrýǵa 18,4 milliard teńge, al ulttyq operator tarapynan 1,5 milliard teńge qarastyrylǵan.
