Parlament Senatynyń tóraǵasy Máýlen Áshimbaev eńbek naryǵy men JOO men kolledj túlekteriniń biliktiligi máselesin kóterdi, dep habarlaidy QazAqparat.
«Bizde jastardyń jumyssyzdyǵy máselesi aitarlyqtai ótkir emes, óitkeni 90-shy jyldary demografiia báseńdedi. Túrli problemalar, daǵdarystar boldy, balalar az dúniege keldi. Biraq 2000 jyldardan bastap jaǵdai ózgerdi, qazir de bala týý kórsetkishi ósip keledi. Mysaly, taiaý jyldary bizde jyl saiyn eńbek naryǵyna 300-350 myń jas shyǵyp otyrady. Ári qarai da bul kórsetkish ósedi. Iaǵni, bul qysymdy aldaǵy 20-30 jylda únemi sezinetin bolamyz. 2003 jyly 247 myń bala týsa, ótken jyly 446 myń bala dúniege kelgen. Qazirdiń ózinde eki ese kóp týady, 20 jyldan keiin olar eńbek naryǵyna shyǵady. Tiisinshe, aldaǵy jyldary balalardyń, jastardyń eńbek naryǵyna shyǵýyn boljap, olardy tiisti jumyspen qamtýymyz qajet», - dedi Máýlen Áshimbaev Senattyń búgingi otyrysynda.
Sonymen birge, Senat tóraǵasy máseleniń ekinshi bóligi jastardyń biliktiliginde jatqanyn basa aitty.
«EYDU elderiniń, Dúniejúzilik banktiń, basqa uiymdardyń mamandarynyń zertteýleri bar. Mektepti aitpaǵanda, JOO men kolledj túlekteriniń biliktiligi aitarlyqtai tómen ekenin, ashyǵyn aitsaq, EYDU elderiniń túlekterimen básekege qabiletsiz ekenin kórip otyrmyz. Joǵary oqý ornyn bitirgen jastar odan ári bilikti jumys oryndaryna ornalasa almaidy. Sosyn qaida barady? Bazarǵa, qurylysqa, ózin-ózi qamtýǵa ketedi. Bárinen buryn jastardyń sapaly jumys oryndaryna barýy úshin túlekterimizdiń jáne jastardyń biliktiligin arttyrýymyz kerek. Tiisti eńbek saiasaty men bilim berý saiasatyn josparlap, iske asyrý kezinde jastardyń óz betinshe jumys istemei, sapaly jumys oryndaryn alýy úshin joǵary oqý oryndary men kolledj túlekteriniń biliktiligin arttyrýymyz kerek», - dedi Máýlen Áshimbaev.
Aita keteiik, Senatta «Halyq tabysyn arttyrýdyń 2025 jylǵa deiingi baǵdarlamasy» keshendi jospary talqylanyp jatyr.
