QR IIM Iývenaldyq politsiia jáne áielderdi zorlyq-zombylyqtan qorǵaý basqarmasy basshysynyń orynbasary Vadim Iatsenko bala tárbiesinde ata-ana mindetin oryndamaǵandar týraly, dep habarlaidy QazAqparat.
«Politsiia ótinishhaty boiynsha sottar jyl saiyn ózderiniń balalaryn tárbieleýge qatysty mindetterin oryndamaǵany úshin bes myńnan astam ata-anany ákimshilik jaýapqa tartady. Bir myńǵa jýyǵy ata-ana quqyǵynan aiyrylady. Osy arqyly biz jasandy túrde elimizde áleýmettik jetimdik deńgeiin kóterýdemiz», - dep toqtaldy V. Iatsenko Parlament Májilisinde balalar quqyǵyn qorǵaýǵa arnalǵan otyrys barysynda.
Osy oraida ol balada laiyqty tárbieniń bolmaýyna jáne olarǵa qatysty zorlyq-zombylyqtyń oryn alýyna kóbine áleýmettik-turmystyq sipattaǵy otbasylyq problemalar sebepshi ekenin atap ótti. Jumyspen qamtýdaǵy, turmystyq problemalardy sheshýdegi, meditsinalyq-psihologiialyq qoldaýdaǵy keshendi kómekti ýaqytyly iske asyrý - táýekel tobyndaǵy kámeletke tolmaǵandar men qiyn jaǵdaidaǵy otbasylardy tiimdi ońaltýǵa yqpal etedi.
Sonymen qatar, V. Iatsenko balalardyń problemasymen ainalysatyn politsiia men basqa da vedomstvolardyń jaýapkershilik aimaǵy bólinip, jiktelgenin jetkizdi. Psihologiialyq, meditsinalyq, áleýmettik kómek kórsetý úshin esepke alýdyń jańa júiesin barlyq deńgeidegi jergilikti atqarýshy organdar júrgizedi.
«Politsiianyń aýmaqtyq organdary ákimdikterge vedomstvolyq esepte turǵan kámeletke tolmaǵandardyń, sondai-aq turmysy tómen otbasylardyń tizimin jiberdi. Búginde politsiia organdarynda turmysy tómen 8 myńnan astam otbasy, kámeletke tolmaǵan 6 myńnan astamy profilaktikalyq esepte tur», - dedi ol.
