Aǵymdaǵy jyldyń basynan beri memlekettik qyzmetshiler 1 mlrd. teńgege jýyq para alǵan. Bul týraly búgin Úkimet úiinde ótken brifingte QR Memlekettik qyzmet isteri jáne sybailas jemqorlyqqa qarsy is-qimyl agenttigi tóraǵasynyń orynbasary retinde Aigúl Shaimova aitty, dep habarlaidy Ult.kz tilshisi QazAqparat agenttigine silteme jasap.
«Aǵymdaǵy jyldyń basynan beri para alǵany úshin 900-den astam adam ustaldy. Olardyń alǵan paralarynyń kólemi ártúrli bolyp keledi. Biraq, 1 million teńgeden kem emes. Degenmen, sońǵy jyldary para alyp isti bolǵan memlekettik qyzmetshilerdiń qatary kemi túsýde», - dedi Aigúl Shaimova.
Sonymen qatar brifing barysynda BAQ ókilderi áleýmettik jelide pikir jazǵan memlekettik qyzmetshi jazalanady degen aqparattyń qanshalyqty shyndyqqa janasatyndyǵyn suraǵan bolatyn.
«Meniń oiymsha, bul jalǵan málimet. «Memlekettik qyzmet týraly» zań aiasynda da, Memlekettik qyzmetshilerdiń Ádep kodeksinde de mundai jaýapkershilik qarastyrylmaǵan», - dedi ol.
Osy rette jýrnalister ShQO memlekettik qyzmet isteri jáne jemqorlyqqa qarsy is-qimyl departamenti basshysynyń mindetin atqarýshy Janna Qabdollaqyzynyń ádep jónindegi keńes otyrysynda áleýmettik jelidegi paraqshasynda ádepke jatpaityn fotolar men pikirler qaldyrǵany úshin 30-dan astam memlekettik qyzmetshiniń jaýapqa tartylǵandyǵyn aitqanyn mysalǵa keltirdi.
«Pikir jazǵany úshin eshkim jazalamaidy. Bul málimetti tekseretin bolamyz. Jalpy memlekettik qyzmetshiniń áleýmettik jelide ózin qalai ustaý kerektigi Ádep kodeksinde kórsetilgen», - dedi agenttik tóraǵasynyń orynbasary.
