Foto: Pexels.com
Qazaqstan Respýblikasy Týrizm jáne sport ministrliginiń Oiyn biznesin jáne lotereiany retteý komiteti áleýmettik jeliler men onlain-platformalarda zańsyz lotereia qyzmetin anyqtaý maqsatynda turaqty túrde monitoring júrgizip keledi, dep habarlaidy Ult.kz.
Monitoring nátijesinde jáne jeke tulǵalardan Komitetke kelip túsken ótinishter negizinde biyl 89 adam QR Ákimshilik quqyq buzýshylyq týraly kodeksiniń (ÁQBtK) 445-1-babynyń 6-bóligi boiynsha ákimshilik jaýapkershilikke tartyldy.
Zańsyz utys oiyndaryn uiymdastyrǵan tulǵalarǵa eskertý hattary joldanyp, oflain jáne onlain formattarda túsindirý kezdesýleri ótkizildi. Áleýmettik jelilerde utys oiyndaryn ótkizgen akkaýnttardyń tizimi ministrliktiń resmi saitynda jariialanǵan.
Hattamamen kelisken jaǵdaida quqyq buzýshylar aiyppuldy óz erkimen tóleidi, al kelispegen jaǵdaida is sotqa joldanyp, sot tártibimen qaralady.
Eske sala ketsek, QR ÁQBtK 445-1-babynyń 6 jáne 7-bólikterine sáikes, lotereia operatory emes tulǵa lotereia ótkizetin bolsa, jeke tulǵalarǵa 100 ailyq eseptik kórsetkish (AEK), al shaǵyn kásipkerlik sýbektilerine (jeke kásipkerlerge) 300 AEK mólsherinde aiyppul qarastyrylǵan.
Bir jyl ishinde osyndai quqyq buzýshylyq qaitalanǵan jaǵdaida aiyppul mólsheri jeke tulǵalarǵa – 200 AEK, shaǵyn kásipkerlik sýbektilerine – 750 AEK bolyp belgilenedi. Sondai-aq ákimshilik quqyq buzýshylyqtan túsken tabys tárkilenedi.
