Memleket basshysy Qasym-Jomart Toqaev Úkimettiń keńeitilgen otyrysynda qandai máseleler qaralatynyn aitty, dep habarlaidy «Ult aqparat».
«Búgin biz koronavirýs indetine qarsy qabyldanyp jatqan sharalarǵa qatysty máselelerdi qaraimyz. Sonymen qatar, biylǵy birinshi jartyjyldyqtaǵy Elimizdiń áleýmettik-ekonomikalyq damýyn qorytyndylaimyz. Jyl basynan beri ulttyq ekonomika kúrdeli jaǵdaida damyp keledi. El ekonomikasy jalpy 1,8 paiyzǵa tómendedi. Pandemiiaǵa bailanysty qyzmet kórsetý salasy aitarlyqtai quldyrady (5,6 paiyz). Halyqty jáne biznesti qoldaý úshin asa mańyzdy sharalar qabyldadyq. Meniń tapsyrmam boiynsha Ekonomikalyq ósimdi qaita qalpyna keltirý jóninde keshendi jospar qabyldandy. Búgin Úkimet pen ákimderdiń ekonomikalyq ósimdi qalpyna keltirý jáne halyqtyń ál-aýqatyn qamtamasyz etý jóninde qabyldaǵan sharalaryn talqylaimyz», - dedi Q.Toqaev kirispe sózinde.
Prezident Úkimettiń keńeitilgen otyrysyn kelesi tártippen ótkizýdi usyndy:
Elimizdiń áleýmettik-ekonomikalyq damýynyń qorytyndylary men jyl sońyna deiin oryndaityn mindetter jóninde Premer-Ministr Asqar Mamin baiandama jasaidy.
Aqsha-nesie saiasatyna qatysty sharalar týraly Ulttyq banktiń tóraǵasy Erbolat Dosaev baiandaidy.
Elimizdegi epidemiologiialyq ahýaldy jaqsartý jónindegi sharalar týraly Densaýlyq saqtaý ministri Aleksei Tsoi baiandaidy.
«Sosyn birqatar oblystyń basshylaryna sóz beremin. Qajet bolsa, basqalarǵa da sóz beriledi. Qysqa ári nusqa, negizgi máselelerge toqtalyńyzdar», - dedi Memleket basshysy.
