Qańtar-sáýir ailarynda otandyq qurylys materialdary 16%-ǵa qymbattaǵan. Bul týraly QR Básekelestikti qorǵaý jáne damytý agenttiginiń tóraǵasy Serik Jumanǵarin aitty, dep habarlaidy QazAqparat.
«Ulttyq statistika biýrosynyń derekteri boiynsha 2021 jylǵy qańtar-mamyr ailarynda bastapqy turǵyn úi baǵasynyń ósýi 8%-dy qurady. Ekinshi qaitalama turǵyn úi baǵasynyń ósýi – 13%. Otandyq qurylys materialdarynyń baǵasyna kelsek, biylǵy qańtar-sáýirde ósim 16% bolǵan», - dedi S. Jumanǵarin búgingi Úkimet otyrysynda.
Turǵyn úidiń sharshy metriniń ózindik qunynyń 49%-y qurylys materialdarynan turady, olardyń negizgileri kirpish, temirbeton buiymdary, metall konstrýktsiialar bolyp otyr.
«Jyl basynan beri baǵanyń ósýi betonǵa 12%, tsementke – 5%, (ishki naryqtyń qamtamasyz etilýi 100%), polietilendi qubyrlarǵa – 10% (naryqtyń qamtamasyz etilýi – 86%), silikatty kirpishke – 6%, ishki naryqtyń qamtamasyz etilýi 50%-dyń ózinde armatýra, shyny siiaqty importqa táýeldi materialdar baǵasynyń eń kóp ósýi baiqalady», - deidi S. Jumanǵarin.
Qurylys materialdar naryqtarynyń qatysýshylary habarlaǵandai, qymbattaýdyń negizgi sebepteri elektr energiiasynyń, magistraldyq temirjol jelisi men janar-jaǵarmai materialdary qyzmetiniń kóterilýi bolǵan.
