Astanada 18-20 qarasha aralyǵynda respýblikalyq «Qaýipsiz jol» jedel-profilaktikalyq is-sharasy ótip jatyr, dep habarlaidy "Ult aqparat" Nur-Sultan qalasy Politsiia departamentiniń baspasóz qyzmetine silteme jasap.
Operatsiia jol-kólik oqiǵalaryn azaitýǵa, jol qozǵalysy erejelerin buzý faktisin anyqtap, boldyrmaýǵa baǵyttalǵan. «Qaýipsiz jol» jedel-profilaktikalyq sharasy barysynda jol-kólik oqiǵasyn boldyrmaýǵa qatysty túsindirý jumystary júrip jatyr.
Is-sharaǵa tártip saqshylarymen birge kólikti baqylaý inspektsiiasy, ákimdik, «QazAvtoJol» UK AQ, «Kazahavtodor» JShS qyzmetkerleri qatysýda. Elorda joldaryn, ásirese túngi ýaqytta baqylaityn patrýldik politsiia jasaǵynyń sany kóbeidi. Qazirgi ýaqytta avtokólikti mas kúide aidaý, kólikti basyp ozý, manevr jasaý, qiylystar men jaiaý júrginshiler jolynan toqtamai ótip ketý, qaýipsizdik beldigin taqpaý, uialy telefonmen sóilesý syndy tártip buzý oqiǵalary tirkelip jatyr.
2020 jyldyń 10 aiynda jol qozǵalysyn baqylaý kezinde 87 myń ákimshilik quqyq buzýshylyq tirkeldi. Kólikti mas kúide júrgizgen 683 adam ustaldy, onyń 619-yna ákimshilik tyiym salyndy. Ákimshilik sottyń sheshimimen jol erejesin buzǵan 704 adam júrgizýshi kýáliginen aiyryldy. Baǵdarshamnyń tyiym salynǵan túsine ótip ketken 945 kólik júrgizýshi tirkeldi. Sondai-aq 8 myń jaiaý júrginshige jol erejesin buzǵany úshin jaýapkershilik júkteldi.
