Jyl basynan beri bolǵan jol apattarynda ondaǵan balanyń ómiri qiyldy jáne 450-ge jýyq bala túrli dárejede jaraqat aldy. Bul týraly QR IIM baspasóz qyzmetiniń ókili Shuǵyla Turlybek aitty, dep habarlaidy QazAqparat.
«Balalardyń jol-kólik oqiǵalarynda jaraqattanýyn boldyrmaý baǵytyndaǵy jumystarǵa qaramastan, el joldaryndaǵy jaǵdai kúrdeli. Jyl basynan beri bolǵan jol apattarynda ondaǵan balanyń ómiri qiyldy jáne 450-ge jýyq kámeletke tolmaǵan bala túrli dárejede jaraqat aldy», - dedi Sh. Turlybek ministrliktiń baspasóz alańynda ótken brifing barysynda.
Ásirese baspasóz qyzmetiniń ókili sońǵy aptada balalardyń ólimine ákep soqqan jol-kólik oqiǵalary erekshe alańdaýshylyq týdyratynyn aitty.
«9 naýryzda Jambyl oblysynda júrgizýshi mas kúiinde kólik júrgizip, Sarykemer-Túimekent avtojolynda jaiaý júrginshini qaǵyp ketti, nátijesinde eki jasar bala qaza tapty, balanyń anasy aýrýhanaǵa jatqyzyldy. Al 10 naýryzda Nur-Sultan qalasynda Syǵanaq kóshesindegi úi aýlasynda júk kóligin júrgizýshi mektep oqýshysyn qaǵyp ketti, ol oiyn kezinde qar tóbeshikten kóliktiń astyna túsken, saldarynan 9 jasar qyz mert boldy.
Osyǵan bailanysty, esterińizge salamyz: balalardy kóshede qaraýsyz qaldyrmańyz jáne olarǵa kólik júretin jol janynda oinaýǵa ruqsat etpeńiz. Balalarǵa eshbir jaǵdaida kenetten shyǵýǵa, júris bóligine, sonyń ishinde jaiaý júrginshiler ótkeline júgirýge bolmaitynyn túsindirip otyryńyz», - deidi Sh. Turlybek.
Osyndai qaiǵyly oqiǵalardan keiin jáne mereke kúnderi qarsańynda ákimshilik politsiia komiteti jol qozǵalysynyń barlyq qatysýshylaryn qaýipsiz qozǵalys jyldamdyǵy men avtomobilder arasyndaǵy qashyqtyqty qatań saqtaýǵa shaqyrady.
