Dúniejúzi qazaqtary qaýymdastyǵy Aýǵanstannan kelgen qandastardyń máselesin kóterdi, dep habarlaidy Sputnik Qazaqstan.
Uiym ókili Qarlyǵash Bekpatshaqyzynyń aitýynsha, búginde Aýǵanstannan keletin qandastarymyz kóp qiyndyq kóredi. Almatynyń ózinde birneshe otbasy úsh jyldan beri azamattyq ala almai dalada qańǵyp júr.
"Adamǵa qarap "siz qazaq emessiz" dep aita salýǵa bolmaidy. Ol jaqta "qazaq" dep qujatqa jazylmaidy. Sonyń kesirinen qazirgi kezde Aýǵanstannan kelgen 95 adamnyń ústinen is qozǵaldy deidi. Ol 95 otbasy – 95 taǵdyr. Ótkende Almatyda bolyp, aryz-shaǵymdardy qabyldaǵanda Aýǵanstannan kelgen 15 otbasynyń sońǵy úsh jyl boiy kúnin kóre almai, qańǵyp júrgenin kórdik. Al 15 otbasynyń árbireýinde bes adam bolsa, qansha adamnyń qańǵyp júrgenin sanai berińiz", - dedi Bekpatshaqyzy májiliste ótken jiynda.
Al, keiin Eńbek jáne halyqty áleýmettik qorǵaý vitse-ministri Ahmadi Sarbasov atalǵan máseleniń mán-jaiyn túsindirdi.
"Qazirgi kezde Aýǵanstannan keletin otandastarymyz oralman mártebesin alý úshin jergilikti organdarǵa barady. Biraq olardyń tólqujatynda "qazaq" degen sóz joq. Ondai adamdar kóp emes. Biraq eki-úsh memleketten keletinderde ondai problema bar. Aýǵanstan da ultty kórsetpeidi. Sodan basqa qaǵazdaryn alyp keledi. Onyń ishinde "qazaq" dep jazylyp turady. Biraq túrine qarasań qazaqqa uqsamaidy. Negizgi suraqtar osy. Onyń qazaq ekenin qalai anyqtaimyz? Osyny sheshýimiz kerek", - dep atap kórsetti Sarbasov.
