Jerorta teńizindegi bosqyndar. Kórneki sýret
Pákistan federaldyq tergeý agenttigi beisenbide Reuters aqparat agenttigine Grekiia jaǵalaýlarynda 209 pákistandyq qaza bolǵanyn habarlady. Júzdegen bosqyn mingen shaǵyn keme ashyq teńizde aýdarylyp, sýǵa batyp ketken.
Marqumdardyń týystarynyń aitýynsha, migranttar mingen keme Liviiadan Grekiiaǵa qarai júzgen.
Bunyń aldynda resmi túrde 82 adam óldi dep tanylǵan, 104 adam tiri qalǵany jariialanǵan. Tergeýshiler qaza bolǵan bosqyndardyń kimder ekenin anyqtap jatyr. Teńizge batqandar budan da kóp bolýy múmkin.
Keiingi birneshe jylda Jerorta teńizinde osynsha kóp adam ólgen apat bolmaǵan.
Buǵan deiin kemede 181 pákistandyq, 28 kashmirlik bolǵany aitylǵan. Dárigerler eki júzge jýyq otbasynyń genetikalyq málimetin jinaǵan.
Al kýágerlerdiń aitýynsha, uzyndyǵy 20-30 metrlik kemede 400-ge jýyq adam bolǵan.
