JÝSAN
(Psihologiialyq drama)
Jádiger - jas jigit (22 jasta)
Ajar - psiholog (60 jasta)
Aqmaral – tergeýshi (40 jasta)
2-Jádiger (Laqap aty – Abdýrrafih) – dini kitaptardy kóp oqyǵan 22 jastaǵy jigit
Ábýbákir (arab) – lańkes (30 jasta)
Serik (Laqap aty – Said-Ahmed) - dini kitaptardy kóp oqyǵan 22 jastaǵy jigit
Jandos (Laqap aty – Zaid) - azǵyrýshy adam (25 jasta)
Qaraqat (Laqap aty - Asma) - Siriiadaǵy qazaq qyzy (22 jasta)
(Sahna ashylmastan buryn óleń oqylady. Jeldiń ýildegen daýysy men dombyranyń qońyr úni estiledi)
Babam sansyz ónerge ie bolǵan,
Alasy men qulasyn qatar súigen
Týǵan jerdiń tósine kie qonǵan.
Ǵumyr keshtik osyny túisine almai,
Kempirqosaq asynǵan atyraptyń,
Aq jaýynnan keiingi isi qandai?!
Qý saǵymyn kún saiyn qýsam eken,
Tánniń dertin emdeitin, jannyń dertin,
Qasietti, qadirli Jýsan eken!
1 – kórinis
(Óń men tústiń, uiqy men qiialdyń arasynda adasyp, maǵynasyzdyqqa shyrmalǵan Jádigerdiń kózine elestemeitin nárse joq. Janarynyń ishinde kólbeńdegen sulbalar jas jigittiń záre-qutyn ushyrady)
Jádiger: Sen kimsiń?
2-Jádiger: Men Raqqada* qalǵan Abdýrrafihpin! Jádigermin men!
Jájiger: Jádiger?! (Tańdanyspen) Men kimmin sonda?
2-Jádiger: Sen jolynan jańylyp, sharasyzdyqty jamylyp, eline áreń qaitqan Jádigersiń! (Eles joǵalady)
Jádiger: Eline áreń qaitqan Jádigersiń deisiń be?! (Jylaidy, kúledi) Tynysym tarylyp barady... Bul men be?! Men emes pe?! Bar da, joq ta siiaqtymyn. Ishimde bir adam sóileitin sekildi. Ol meniń kúnálarymdy, kinálarymdy sát saiyn esime salady. Joq! Mende kiná joq! Men kúnáhar emespin! Men eshteńe búldirgen joqpyn! (Óz-ózine suraq qoiyp, óz oiynan ózi shoshidy) Nege maǵan adamdar birtúrli kózqaraspen qaraidy? Múmkin, onyń aitqandary ras shyǵar?! Men bárin durys jasaǵanmyn! (Kenet dosyn eske alady) Serik... Serik... Serik! (Qos qolymen jer qarmap, áldene izdegendei bolady) Keýdeńde janyń bolsa, dybystashy! Meni jalǵyz qaldyrma! Nege úndemeisiń?! Álde, aiaq-qolyń julynyp, kozǵala almai jatyrsyń ba?!(Sál únsizdikten keiin) Kettim! Keldim!
Túk te ózgergen joq. Biraq, ózimmen-ózim sóilesip, qaidaǵy-jaidaǵyny nege oilai beredi ekem?! Jooooq! (Ajar Jádigerge jaqyndaidy)
Ajar: Ne bop qaldy, balam?! Ne boldy?!
Jádiger: Áje, men úidemin ǵoi, aitshy?! Úide ekenime sendirshi meni. Maǵan ″úidesiń″ deshi.
Ajar: Taǵy qorqynyshty tús kórgensiń be?
Jádiger: Reihannyń... Shamnyń... Bagýzdyń... Hamanyń...* tas-talqany shyqqan kósheleri, sábilerdiń qanjosa bolǵan táni, ábden shoshynǵan áielderdiń beinesi kóz aldymnan ketpeidi.
Ajar: Seniń júike-júieńde, alpys eki tamyryńda shaiqas oinaq salsa, meniń árbir demimde, meniń árbir sózimde sen barsyń, altynym!
(Ajar men Jádigerdiń janyna Aqmaral keledi)
Aqmaral: Sálemetsiz be?!
Jádiger: Kórshi apa?! (Psiholog Ajar tergeýshi Aqmaralǵa ony Jádigerdiń kórshisi, dosy Seriktiń anasyna uqsatqanyn ymmen túsindiredi)
Ajar: Amansyń ba, ainalaiyn! Qosh keldiń!
Jádiger: Hálińiz qalai, jaqsysyz ba?
Aqmaral: (Kórshiniń keipine enip) Jaqsymyn! Ózderińiz qalaisyzdar?
Ajar: Qudaiǵa shúkir, esen-saýmyz. Balańnan habar bar ma?
Aqmaral: «Jýsan» operatsiiasymen qańtarda kelgenderdiń arasynda da, mamyrda kelgenderdiń arasynda da joq. Vokzalǵa, aeroportqa baryp: «Balamnyń atyna alynǵan bilet bar ma», - dep suradym. «Joq» dedi. Jurttyń balasy kelip jatyr. Al, meniń Serigimniń qarasy kórinbeidi. Qudai-aý, ne kórmedim! Kútý... Kútý... Taǵy da kútý... Kútýden basqa ne amal bar? Solǵan úmitim de úzilýge jaqyn.
Ajar: Úsh jyl boiy kóz jasyńdy kóldetip, sary ýaiymǵa salyndyń. Bulai jalǵasa berse, aýyryp qalasyń.
Aqmaral: Qalai oilamaimyn?! Úsh jyl... Sharshatqan... qaljyratqan úsh jyl. Serigimniń ne óli, ne tiri ekenin bile almai, bir aýyz habaryna zar boldym. Ne isteimin? Jádigerden ulym týraly suraǵan saiyn qatty qinalamyn. Soǵys esime tússe, denem túrshigedi. Keshe balamdy elge qaitarýdy ótinip, quqyq qorǵaý organdarynan kómek suradym. Ýaqyt keregin aitty. Maqashaty kóp jumys eken. Bizge bári ońai kórinedi. Ulym kelgenshe taǵatym taýsylar.
Ajar: Iá, solai... Seni menen artyq túsinetin kim bar?!
Aqmaral: Nemereńizdiń oralǵanyna qýanyshtymyn. Áiteýir, balamnyń tiri ekenin bildim. Endi aman-esen kelýin kútý ǵana qaldy.
Ajar: Shái ázirleiin. Áńgimelese turyńdar!
(Ajar shyǵyp ketedi. Aqmaral tergeýge kirisedi)
Aqmaral: Aqanov Jádiger! Qalaisyń?
Jádiger: Jaqsymyn. (Abdyrap)
Aqmaral: Meni tanyp tursyń ǵoi, iá?
Jádiger: O ne degenińiz? Árine, tanyp turmyn.
Aqmaral: Serik týraly aitshy maǵan...
Jádiger: Ol qaisar jigit. Jaǵdaiy jaqsy, ýaiymdamańyz.
Aqmaral: Sen elde, óz úiińde alańsyz júrsiń. Al, meniń ulym qinalýda. Nege úndemeisiń? Tiliń bailanyp qaldy ma? Sen ǵoi balamdy sol jaqqa alyp ketken. Ony Jandospen tanystyrǵan da - Sensiń! Balamnyń qurdasy ǵoi dep balamdai jaqsy kórdim. Sen bolsań, tý syrtymyzdan pyshaq urdyń.
Jádiger: Esimde eshteńe joq. Meni keshirińizshi.
Aqmaral: Esińe túsir. Sen báriń de bilesiń. Ótirik múláiimsime!
(Sahna qarańǵylana túsedi)
2 – kórinis
(Sahnada qara kiimdiler qaptap ketedi)
Ábýbákir: Assalamýǵalaikým ýa rahmatýllahi ýa barakatýh, káifa halýkým? (Assalaýmaǵaleikúm, qalaisyńdar, amansyńdar ma?)
2-Jádiger: Ýalekýmassaliam ýa rahmatýllahi ýa barakatýhý. Alhamdýlillah. (Ýaǵaleikúmassalam, jaqsymyz.)
Ábýbákir: Asmamen tanysyńdar. Kúieýi jaqynda qaza tapty. Erlikpen kóz jumǵandardyń januiasyn qańǵytyp jiberýge tiisti emespiz. Solai ma?
Serik: Árine, solai. Sózińizdiń jany bar.
Jádiger: Ásirese, bizdiń halyq - jesiri men jetimin jylatpaǵan halyq.
Ábýbákir: Iá! Moiyndaryńa júktelgen mindetti ashyq jetkizý maǵan – Sert, qaltqysyz oryndaý senderge – Sert! Endi esimderińdi esterińnen shyǵaryńdar! Sen búginnen bastap Jádiger emessiń, Abdýrrafihsiń!
(Serik pen Jádiger túsinbei bir-birine qaraidy)
Ábýbákir: (Serikke qarap) Al, sen - Said-Ahmedsiń! Keshegidei emes, bastaryńa aqyl kireiin degen eken. Aitqan sózderińniń atylǵan oqpen teń ekenin eskerttim. Qaqpanyma top ete qaldyńdar.
Endi... bireýiń Asmamen nekelesýleriń kerek!
Serik: Nemene?!
Jádiger: Nekeleskeni nesi? Mahabbat qaida?!
Ábýbákir: Mine, saǵan mahabbat!
(Bir jendet Jádigerdi qarýymen basynan salyp qalady. Shekesinen qan sorǵalaǵan Jádiger shalqalai qulaidy. Arasha túsken Serik te tumsyqtan soqqy alady.)
Ábýbákir: Ashýyma tidińder! Oilanbaǵan orǵa jyǵylady. Jańa ǵana jetim men jesirdi jylatpaimyz dep sambyrlaǵan sender emessińder me?! Endi mahabbat qaida dep ottap tursyńdar. Muhammed paiǵambar (s.ǵ.s) ″Qudaidy súigennen keiingi basty paryz – bir-birińdi súiý″ degen. Neke – súiýdiń alǵysharty.
Serik: Sabyr etińiz! Sabyr etińiz! Aitqanymyz ras. Alaida...
Ábýbákir: Aýyzdaryńmen arpalyspai, qaiyssyń úilenesińder, sony sheshińder, sáldeń soń qaita soǵamyn!
(Asmany ertip, Ábýbákir ketip qalady, Serik pen Jádiger ǵana qalady)
Serik: ″Nekeniń bir ushy – alty qat aspanǵa, bir ushy - jeti qat jerge bailanǵan. Neke jibin úzseń – perishtelerdiń kúimesi kúireidi″ degen kóne nanym bar. Bul jaqta eshkim eski ilanymdarǵa mán bermeidi eken. Jandos kináli bárine. Bizdiń osynda kelýimizge sebepshi boldy.
Jádiger: Iáá, Jandos kináli. Muhammed Paiǵambar (s.ǵ.s): ″Alla bar. Ol asa meiirimdi. Biz sonyń ǵana buiyrǵan jolymen júrýimiz qajet″ degen.
Serik: Asmaǵa kim úilenedi? Sony shesheiik. Úilenbesek, ólemiz. Túsingenim boiynsha, olar bizdi ózderiniń aitaǵyna kónetin áskerlerdiń qataryna qosty.
Jádiger: Sen úilenseńshi, Serik.
Serik: Joq! Bolmaidy! Men ata-anamnyń kelisimimen úilenýim kerek. Ata-anamnyń kelisimi dep qoiamyn. Búginge deiin olardy oilaǵan kisishe. Sen úilenshi, Jádiger! Jalǵyz ájeńniń kóńilin tabarsyń.
Jádiger: Eee, taǵdyrdyń aidaýymen osy sátke de jettik de... Jaraidy, endeshe. ólmestiń qamy ǵoi bul da.
(Asmany ertip, Ábýbákir kiredi)
Ábýbákir: Iá, ne sheshtińder?!
Serik: (Sál únsizdikten keiin) Abdýrrafih úilenetin boldy.
Ábýbákir: Abdýrrafih?! Káne, óz aýzyńnan estiin... (Salqynqandylyqpen)
Jádiger: Said-Ahmedtiń sózin rastaimyn.
Ábýbákir: Jaqsy. Said-Ahmed, sen júr. Sharýa bar!
(Lańkeske lesip Serik ketedi. Jádiger men Asma ońasha qalady.)
Jádiger: Asma...
Qaraqat: Iá, tyńdap turmyn.
Jádiger: Sen ne, qazaqsyń ba?! Shyn esimiń kim?!
Qaraqat: Qaraqat... (Jasqanyp)
Jádiger: Kúieýiń qalai qaza tapty?
Qaraqat: Soǵysta ólgen ekinshi kúieýim. Birinshi kúieýimdi Ábýbákirdiń ózi óltirdi-aý deimin.
Jádiger: Ózi óltirdi?! Nege?
Qaraqat: Ekeýine ortaq qupiiany bireýge baiqamai jariia qylǵany úshin qatty jazǵyryp edi. Keiin atylǵanyn bildim.
Jádiger: Ekinshi kúieýińe qalai qosyldyń?
Qaraqat: Saǵan qalai qosty, oǵan da solai qosty. Ony da soǵysta óldi dedi ǵoi, ózderi óltirdi me, Qudai bilsin...
Jádiger: Ulty qandai edi?
Qaraqat: Qazaq emes! Aitqym kelmeidi.
Jádiger: Qatelespesem, birinshi kúieýińmen birge keldiń ǵoi?
Qaraqat: Iá, birge kelip, birge ketemin degen oimen keldim!
(Qaraqat jan syryn aqtarady)
Qaraqat: Jubaiyma sengenmin. Bir-birimizge essiz ǵashyq edik. Meni osy kúnge deiin osynshama qiyndyqqa shydatqan sol mahabbat sekildi. Úreiimdi ushyratyn jandarǵa qarasam, alpys eki tamyrymdy idirip, janymdy shattyqqa toltyrǵan tańdarǵa ketip qalǵym keledi.
Júregimizde týlaǵan ystyq sezim bizdi qandai jolǵa salyp, qandai torǵa túsiretinin kim bilgen?! Bárin saǵyndym... Ata-anamdy da saǵyndym! Tipti, aýylymdaǵy maǵan múlde jat adamdy da saǵyndym! Alańsyz shaqtarym men aiaýly anamnyń qushaǵynda emin-erkin, ýaiymsyz qalyń oiǵa batqanym - jii esime túsedi.
Taǵdyrdyń isine shara bar ma?! Qazir názik júregim - tastai qatty... sózim - jastai ashy... kózim - ótkir, oiym - shashyrańqy, sanam - sergeldeń, tózimim - taýsylǵan, sezimim - ólgen!
Qaitsem eken?! Uiqy bermei, shoshytyp, mazamdy alǵan da - sum soǵys; tar qursaǵymdy keńitip, tas emshegimdi jibitken balamdy alǵan da - sum soǵys!
Men endi beibit kúndi ýaqytynda baǵalamaǵan beibaqpyn!
2-Jádiger: Beibit kúndi kim baǵalap jatyr deisiń?! (Bir-birine jaqyndaǵan kezde sahna qarańǵylana túsedi) Talaq!!! (Qaraqattyń shyrqyraǵan jan daýysy estiledi)
3 – kórinis
(Qur súldesi qalǵan Qaraqattyń janyna Jandos keledi)
Serik: Jádiger?! Asma?!
(Serikke bireý qarý kezenedi)
Jandos: Beri qara!
(Serik jalt burylady)
Serik: Jandos?!
Jandos: Serik?! Baýyrym-ai! Qalaisyń? (Mańǵazdanyp)
Serik: Jandos?! Bul senbisiń?! Munda qaidan júrsiń?! Jádiger qaida?
Jandos: Jádiger de osynda...
(Ekeýi qushaqtasady)
Serik: Ne jylarymdy, ne kúlerimdi bilmeimin.
Jandos: Myna mańda tanysyńdy kezdestirý baqyt qoi.
Serik: Qaidaǵy baqyt?! Meni taýqymettiń ústine ákelip, tastap jibergenińdi esime alsam, órtenip kete jazdaimyn.
Jandos: Túsinbedim! Nege?! Men ne jasap qoidym? Meniń qandai kinám bar?!
Serik: Meniń qandai kinám bar deisiń be?! Bir aýyldyń aýasyn jutyp, bir shatyrdyń astynda bir tabaqtan as ishken, bir qudyqtan sý ishken jan baýyryńdy mań dalada jer jastandyryp, qaptaǵan qara qarǵalardyń jolynda qurban qylmaqsyń ba?! Artta qalǵan aǵaiyndy qaiǵyǵa bóktirip, japan dalada jortqan jyrtqyshtarǵa jem qylmaqsyń ba?! Ońǵan ekensiń! Miyń tipten ýlanǵan eken! Bárine kináli - sensiń! Men seni osy jerde baýyzdap óltiremin! (Serik Jandosqa pyshaq ala umtylady)
Jandos: Said-Ahmed - Serik! Serik - Said-Ahmed! Qalai-qalai sóileisiń?! Bul jaqtaǵy jankeshtilerdiń senimine shek keltirip tursyń ba?! (Shyrt túkirip, tistenip) Jerles ekenińdi ǵana eskeremin. (Tapanshasyn kezenip) Áitpese, jańaǵy sózderiń seni ólimge jeteleitin edi. Sózin qarai gór. Qydyram dedińder, qydyrdyńdar. Senderge maǵynaly is-áreketke, haq jolǵa qarai baǵyt bergen men emes pe edim?! Jandaryńdaǵy baqty japan daladan izdegen ózderiń emes pe?! Saý basyna saqina tilegen adamdy qaýipten qutqaratyn amal – tiregi myqty adamnyń yǵyna jyǵylý. Durys baǵyt berdiń dep alǵys aitýdyń ornyna...
Serik: (Jandostyń sózin bólip) Búitken baǵytyń qurysyn! Alańsyz kúnderimdi azaityp, mazasyz túnderimdi kóbeittiń!
(Jandos pen Serik judyryqtasady. Ábýbákir tóbelestiń ústinen túsedi)
Jandos: Ábýbákir, myna Said-Ahmed qashqaly júr.
Ábýbákir: Ras pa, Said-Ahmed?! Bizde qashqyndarǵa qandai jaza qoldanylatynyn bilesiń ǵoi? (Ábýbákirdiń sózinen keiin sahnaǵa asylyp turǵan adamdar túsiriledi) Zaid, bul kimmen birge keldi?!
Jandos: Abdýrrafihpen!
Ábábákir: Abdýrrafih, senimen birge kelgen jigit pe?
2-Jádiger: Iá!
Ábýbákir: Baýyryńmen qoshtasyp qal, Abdýrrafih! Said-Ahmedti jazalańdar!
(Jendetter óltirýge yńǵailanady)
4 – kórinis
(Keiipkerler sandyraqtaǵan Jádigerdiń qasynda kezekpen sóileidi)
Aqmaral: Aiyptalýshy Aqanov Jádigerdiń qylmystyq isine tergeý júrgizý maǵan júkteldi. Tergeý barysynda jyldai boiy, ailar boiy kelmeske ketken ulyn oilap, qaiǵyrǵan ananyń keipine enýime týra keldi. Tergeý júrgizý ońai bolǵan joq. Men Serikti joǵaltqan Aqmaralǵa ainalyp ketýge sál qaldym:
Kútýdi toqtatpadym. Balam kirip keletindei esikke qarai berdim. Jaqynnan daýys estilse, alasurdym. Jádiger shyndyqty ańǵaryp qalǵan joq pa dep... Eh, óz-ózin joǵaltqan jandar-ai. Kútkeni kelmeitin de shyǵar. Alaida, ana júregi perzentin oilai beredi eken. Úmitin úzbeidi eken... Saǵynady eken, qamyǵady eken...
Tergeý nátijesinde aiyptalýshynyń soǵys kezinde basynan soqqy alǵany, qatty shoshynǵany anyqtaldy. Aqanov Jádigerdiń isin sotqa tapsyramyn!
Asma: "Jýsan" operatsiiasymen elge oraldym. Qanshama jan óz eline qaitty. Qanshama jan sol jaqta qaldy? Qazaq bop týǵanyma qýanamyn. Bizdiń ulttyń azamattary men azamatshalary anaý ólkeden ketip bara jatqanda ózge ult ókilderiniń kózderinde móldir tamshy móltildep turdy. Azaptan qutylǵanyma sener-senbesimdi bilmedim. Týǵan jerim alystan munartqanda júregimniń jarylyp kete jazdaǵanyn-ai... Rahmet saǵan, taǵdyr. Meni qaitadan elimmen, óz úiimmen tabystyrǵanyńa rahmet!
Osy kúnime de táýba! Biz siiaqty adasqan qulyndaryn ózekke teppei, qandai bolsa da ózimdiki dep baýyryna basqan, shashylǵan jerimizden jinap alǵan Otanymyzdyń baryna táýba! Kimge kerek edik biz, meiirimdi Otanymyz bolmasa?! Aiyptymyz... Qaitsek jýylar eken ol aiyp?!
Ajar: Adam psihologiiasyn zertteý – shydamdy, eńbekti talap etedi. Bizdiń qanattyǵa qaqtyrmai, tumsyqtyǵa shoqyttyrmai ósirgen ul-qyzdarymyzdyń adasatyny qalai? Kóringenge lesip, dúniege talasatyny qalai?! Qoshtaspastan joǵalyp, zaryqtyryp, saǵyntyp, qaidaǵy joq sandyraqtarmen sanasyn ýlap oralatyny qalai?! Baýyr etiń - balań qashan da ystyq. Qýansa, qýanyp, jylasa, jylaisyń. Solar úshin ǵumyr keship jatyrmyz ǵoi. Urpaq aman bolsyn, solar aman júrsin. Jádiger tiri ólik siiaqty. Qaiteiin... Endigi onyń taǵdyry sottyń qolynda!
5 – kórinis
(Jalǵyz otyrǵan Jádigerdiń janyna 2-Jádiger keledi)
Jádiger: Serik?! Men seniń tiri ekenińdi sezgenmin!
2-Jádiger: Men Serik emespin!
Jádiger: Kimsiń sen?!
2-Jádiger: Men – Senmin!
Jádiger: Men kimmin sonda?!
2-Jádiger: Sen dosyn óltirgen Abdýrrafihsyń! Jádigersiń sen! Bárin bilesiń! Iá, iá, Jádiger, sen bárin óte jaqsy bilesiń.
Jádiger: Neni?
2-Jádiger: Bárin, óziń týraly shyndyqtyń bárin...
Jádiger: Eshteńe bilmeimin.
2-Jádiger: Onda nege sát saiyn kúizele beresiń? Jan balasy uqpaityn tús kóresiń?
Jádiger: Bilmeimin.
2-Jádiger: Qai jaqtan kelip qalady eken dep úmitińdi úzbei, dosyńdy izdeisiń.
Jádiger: Dos deisiń be?
2-Jádiger: Seni qatty shoshytqan álem qaida, seni qatty súietin ájeń qaida? Janyńdy jaralaǵan adam qaida, panań qaida, Jádiger?!
Jádiger: Saǵat saiyn mazamdy alatynyń ne?
2-Jádiger: Qashpa, qashpa, Jádiger, qashpa!
Jádiger: Men eshteńe bilmeimin! Men... Men... Men jolynan adasqan Jádigermin!
(Eles joǵalady. Sot úkimi habarlanady)
Aqanov Jádiger - QR-nyń Qylmystyq Kodeksiniń
257-baby «Terroristik top qurý, oǵan basshylyq etý jáne onyń áreketine qatysý» boiynsha kózdelgen qylmystyq is-áreket negizinde 7 jylǵa bas bostandyǵynan aiyrylsyn!
(Ań-tań bolǵan Jádiger óz-ózimen kúbirlep sóilep ketedi)
Jádiger: Terezelerdi tún saiyn Ajal qaǵady,
Ajardyń - alań, kóńildiń - ǵazal qonaǵy.
Aýylymdy eske salady, baýyrymdy eske,
Joldan adasqan adamnyń "azandaǵy áni".
Otqa qaradym ińirde... shoqqa qaradym,
Sál qatelessem, keýdeme oq qadalady.
Mińgirlei berdim, birdeńe búldirgendeimin,
Sezinip turmyn tirliktiń toqtamaǵanyn.
Júrekti patsha qylǵanmyn, sanany - ýázir,
Jaýyzǵa qarsy kóterer jalaýym ázir!
Ashýǵa býlyqqan bireý qinady kópti,
Ashýdan qoryqqan bireý jaraly qazir!
"Azandaǵy ánniń" oiyma Yrǵaǵy oralyp,
"Sýda da - ǵarip", - dedi ″jurt - qumda da - ǵarip!"
Qarańǵy qapas ishinde tózimdi óltirip,
Endi men ǵumyr keshemin muńǵa qamalyp!
(Sál únsizdikten keiin)
Qatelestim. Adastym. Jańyldym. Bárine ókinemin. Barmaýym kerek edi, ketpeýim kerek edi. Jendetterdiń janyna jetpeýim kerek edi. Biraq, ókine bergennen ne paida?! Ótkendi umytý da qiyn. Ótinemin, meniń qateligimdi qaitalamańdar, meniń jolymmen júrmeńder... Ótinemin...
(Sahna qarańǵylana túsedi. Jádigerdi qara kiimdegi sulbalar tuńǵiyqqa tartyp bara jatady...)
*Raqqa, Reihan, Sham, Bagýz, Hama – qala ataýlary.
Marlen Ǵilymhan
