Siriiadan 231 Qazaqstan azamaty elge jetkizildi. Bul jaiynda Qazaqstan Respýblikasynyń Prezidenti Qasym-Jomart Toqaevtyń málimdemesinde aitylǵan, dep habarlaidy "Ult aqparat".
«Meniń tapsyrmam boiynsha 7 jáne 9 mamyr kúnderi Siriiadan 231 Qazaqstan azamaty elge jetkizildi, onyń 156-sy - balalar, deni mektep jasyna deiingiler, sonyń ishinde 18-i - jetim balalar. Bul aýqymdy gýmanitarlyq aktsiia - Tuńǵysh Prezident - Elbasy Nursultan Nazarbaevtyń tapsyrmasymen biyl qańtar aiynda júrgizilgen «Jýsan» operatsiiasynyń jalǵasy», - delingen QR Prezidentiniń baspasóz hatshysy Berik Ýáli Feisbýktegi paraqshasynda jariia etken Memleket basshysynyń málimdemesinde.
Q.Toqaevtyń atap ótýinshe, memlekettik organdar men úkimettik emes uiymdar elge qaitarylǵan azamattarmen ońaltý sharalaryn júrgizdi. Olarǵa meditsinalyq, psihologiialyq jáne áleýmettik kómek kórsetildi.
«Qazirdiń ózinde atalǵan jumystyń oń nátije berip otyrǵanyn aitýǵa bolady. Biyl qańtar aiynda elge oralǵan áielder burynǵy radikaldyq ómirinen bas tartty, jumysqa ornalasty, týystarymen qaita bailanys ornatty. Balalary mektepke, balabaqshaǵa bardy. Qaqtyǵys aimaqtaryna shyqqan Qazaqstan azamattary mundai oisyz qadamǵa terroristerdiń teris, shyn máninde, jalǵan úgit-nasihatynyń yqpalymen bardy. Búginde olar jańa ómir bastaý úshin óz erkimen Qazaqstanǵa oralyp jatyr. Olardyń jasaǵan qateligi úshin balalary ózge elde qinalyp, zardap shekpeýi tiis»,- dedi Memleket basshysy.
Sonymen qatar Prezident Qazaqstan terrorizmmen kúres júrgizý, sondai-aq qiyn jaǵdaida qalǵan azamattaryna qol ushyn sozý mindettemelerinen bas tartpaitynyn, gýmanitarlyq aktsiia jalǵasa beretinin atap ótken.
«Biz óz azamattarymyzdyń taǵdyryna eshqashan bei-jai qaramaimyz. Atalǵan gýmanitarlyq operatsiiaǵa qatysqan Syrtqy ister ministrliginiń, Ulttyq qaýipsizdik komitetiniń jáne basqa da memlekettik organdardyń qyzmetkerlerine jáne sheteldik seriktesterge alǵysymdy bildiremin», - dedi Q.Toqaev.
