Almatynyń túbinde qulaǵan ushaqtyń ishinde bolǵan kásipker Aslan Nazaráli apattyń qalai bolǵanyn aityp berdi, dep habarlaidy Sputnik Qazaqstan.
"Men ózim Almatyda turamyn. Nur-Sultanda filialymyz bar. Soǵan baryp, bir sharýalardy rettep keletin oiym boldy. Sóitip, tańǵy reiske bilet alyp, astanaǵa ushpaqshy edim", - dep bastady áńgimesin Nazaráli.
Onyń aitýynsha, ushaqqa otyrǵanda bári durys bolǵan. Tipti, jerden sál kóterilgende eshqandai aqaýlyq baiqalmady. Biraq, kóp uzamai, ushaq shaiqala bastady.
"Kádimgidei qaiyq siiaqty ary-beri shaiqalyp, teńselip ketti. Sosyn ushaqtyń bári selkildei bastady. Men ózim qulaqqap taǵyp, telefondy qarap otyrǵanmyn. Bas kezinde mán bergen joqpyn. Al ushaqtyń sol jaq qanaty, odan keiin oń jaq qanaty qatty selkildep, artynan "tyrs" degen dybys shyqqanda bir aqaýlyqtyń shyqqanyn túsindim. Bireý ushaqty tartyp qalǵandai boldy", - deidi Nazaráli.
Kásipker 15 qatarda otyrǵan. Ushaq qulaǵannan keiin 14-shi qatarǵa deiin otyrǵan jolaýshylardyń basym bóligin zardap shekti.
"Soqqynyń zardabyn 14-shi qatarǵa deiin otyrǵan adamdar kórdi. Aldymda sol jaqta otyrǵan bir adamnyń qysylyp qalǵany anyq esimde. Bári dúrligip ketti, balalar jylady. Oń jaqta bireý apattyq esikti ashty. Sóitip, bárimiz sodan shyǵýǵa umtyldyq. Ushaqtyń qanatymen tústik. Ol taiǵaq boldy. Bárimiz qulap, jyǵylyp shyqtyq qoi", - dep atap kórsetti kásipker.
Onyń sózine qaraǵanda, aman qalǵan jolaýshylar zardap shekkenderge kómek kórsetti. Bireýdi ushaqtan shyǵardy, bireýine dalada járdemdesti.
"Kóp adam zardap shekti. Sebebi 14 qatarǵa deiin ushaq qatty buzyldy. Jaraqat alǵandar óte kóp boldy. Bireýdiń aiaǵy syndy, bireýdiń basy jaryldy. Omyrtqasynan jaraqat alǵandardy kórdik. Biz bárimiz dalada boldyq. 30 minýttan keiin órt sóndirýshiler keldi. Artynan taǵy 10 minýt ótken soń, sprinter kelip jetti. Onyń ishinde meditsina mamandary boldy", - dedi Nazaráli.
Almatydaǵy tragediia
Qaiǵyly oqiǵa búgin tańǵy jetide Almaty túbinde boldy. Almaty áýejaiynan Nur-Sultanǵa ushyp shyqqan Fokker 100 ushaǵy kóp uzamai Talǵar aýdanyndaǵy eldi mekenge qulady.
Ushaq bortynda 93 jolaýshy, 5 ekipaj múshesi bolǵan.
Politsiia ázirge 12 adamnyń qaza bolǵanyn rastady. Kóz jumǵandar arasynda generaldar keńesiniń tóraǵasy Rústem Qaidarov pen respýblikalyq internet-portaldyń shyǵarýshy redaktory Dana Krýglova bar.
Memleket basshysy Qasym-Jomart Toqaev mert bolǵandardyń jaqyndaryna kóńil aityp, kináli adamdar qatań jazalanatynyn jetkizdi. Condai-aq, Prezident 28 jeltoqsandy jalpyulttyq aza tutý kúni retinde jariialady.
