Foto: ashyq derekkóz
Belgili jýrnalist, professor, «jýrnalistikanyń ustazy» atanǵan Káken Qamzin alaiaqtardyń arbaýyna túsip, jalǵyz baspanasynan aiyrylyp qalýdyń az-aq aldynda tur. Bul týraly shákirti ári áriptesi Aibar Oljaev óziniń áleýmettik jelidegi paraqshasynda jazdy, dep habarlaidy Ult.kz.
Jazba avtorynyń aitýynsha, ardager jýrnalistiń sengishtigin paidalanǵan alaiaqtar kinodaǵydai stsenariimen áreket etken. Aldymen ózderin «Energosbyt» kompaniiasynyń qyzmetkerlerimiz dep tanystyryp, páter iesiniń jeke derekterin — mekenjaiy, JSN, tirkelgen turǵyndar sany týraly aqparatty bilip alǵan. Artynsha ózderin Ulttyq qaýipsizdik komitetiniń qyzmetkerlerimiz dep kórsetip, úiin bireýler tartyp almaqshy ekenin aityp, múlikti tez satýǵa kóndirgen. Jýrnalistke aqshany Ulttyq banktiń arnaiy shotyna salý kerek degen syltaýmen qolma-qol aqshany kýrer arqyly aldyrtqan.
Osylaisha, Káken Qamzin úiin notariýs arqyly satyp, alaiaqtardyń qolyna túsken aqsha endi qaitarylmaityn jaǵdaida qalyp otyr. Qazirgi tańda Almaty qalasy Áýezov aýdandyq politsiia basqarmasy bul derek boiynsha qylmystyq is qozǵady. Alaiaqtyq baby boiynsha tergeý júrip jatyr.
