Foto: voxpopuli.kz
BAQ ókilderine shabýyl jasaý isi boiynsha 30-dan astam qylmystyq is qozǵalyp, tergeý amaldary júrip jatyr. Bul týraly Ishki ister ministri Marat Ahmetjanov málim etti, dep habarlaidy QazAqparat.
«Jýrnalisterge jasalǵan shabýyl faktileri boiynsha 30-dan astam qylmystyq is qozǵaldy. Sonymen qatar 22 adam ustaldy. Qazir onyń jeteýi qamaýda, qalǵandaryna jasyn eskere otyryp, qoǵamnan oqshaýlanýǵa qatysty emes bultartpaý sharasy tańdaldy. Qazirgi ýaqytta sotqa deiingi tergeý júrip jatyr. Atalǵan iske qatysty aqparat beriledi. Sonymen qatar shabýyl jasaý faktileri boiynsha protsedýralyq tulǵalar da bar», - dedi Marat Ahmetjanov Úkimet otyrysynan keiin BAQ ókilderiniń saýalyna jaýap bere turyp.
Onyń aitýynsha, jábirlengen jýrnalister isti tergeý barysyna qatysady.
«Áriptesterińiz bul protseske qyzyǵýshylyq tanytyp otyr, olar is protsesine qatysý mártebesine ie. Suraqtaryn qoiyp, belsendi qatysa alady. Sol siiaqty belgili bir tergeý áreketterin júrgizý týraly ótinish jasai alady.
Qazir tergeý áreketteri júrip jatyr, basqa faktiler men mán-jailar paida bolǵan kezde, biz qoldanystaǵy is júrgizý zańnamasy sheńberinde mindetti túrde habardar etemiz», - deidi ministr.
Eske salsaq, IIM jáne UQK vedomstvoaralyq jedel-tergeý toby BAQ ókilderine shabýyl uiymdastyrǵan kúdikti toptyń jolyn kesti.
Sondai-aq, jýrnalisterge shabýyl uiymdastyrdy degen shetel azamaty 2 aiǵa qamaýǵa alyndy.
