Aqparat jáne kommýnikatsiialar ministri Dáýren Abaev memlekettik qyzmetkerlerdiń jalaqysy olardyń jýrnalister joldaǵan saýaldarǵa bergen jaýabynyń sapasyna bailanysty bolatynyn aitty, - dep habarlaidy kaz.tengrinews.kz.
Abaev jýrnalisterge berilgen jaýaptardyń sapasy men onyń joldanǵan ýaqytynyń bonýstyq-baldyq júiede eskeriletinin aitty.
"Iaǵni, eger ol jýrnaliske jaýap bermese, onyń reitingi túsedi. Ol degenimiz az jalaqy men az bonýs alady degen sóz. (...) Qyzmetkerde arnaiy KPI (jetken jetistikteriniń kórsetkishi - avtor.) bolady. Ol sol kórsetkishke sáikes bolýy tiis, soǵan bailanysty jumys isteýi kerek. Al basshysy ony baqylap otyrady - KPI-ge sáikes pe, joq pa. Ony jumystan qýyp jiberip, ornyna basqa bireýdi alsa da bolady. Kez kelgen sheneýnik jýrnalisterge jaýap berýi tiis. Sebebi ol alda suraqtardyń áli de bolatynyn túsinedi", - dedi Abaev Májilis otyrysynan tys.
Sondai-aq, Abaev BAQ ókilderine resmi jaýap berýdegi erejelerge toqtaldy.
"Memlekettik organdarda ishki reglamentteý bar. Iaǵni, tótenshe jaǵdai bolǵan jaǵdaida biz bir saǵat ishinde sol jaǵdai boiynsha mindetti túrde túsinik berýimiz qajet. Al ol oqiǵa resmi habarlamalarda shyǵyp qoiǵan jaǵdaida biz oǵan bailanysty pikirdi úsh kún ishinde emes, eki kúnde berýimiz qajet. Biz ýaqytta kerisinshe qysqartyp jatyrmyz. (...) Resmi ókil degen túsinikti engizip jatyrmyz. Buqaralyq aqparat quraldarymen bailanysqa shyǵyp, olarǵa jeke-jeke jaýap beretin adamǵa statýs berip jatyrmyz", - dedi ministr.
