Anneksiialanǵan Sevastopolde áskeri-teńiz flotynyń jetekshisi admiral Nikolai Evmenov jáne Qara teńiz flotynyń basshylyǵy birneshe kún buryn sýǵa batyp ketken "Moskva" raketalyq kreiseriniń ekipaj ókilderimen kezdesti. Kezdesý videosy Resei qorǵanys ministrliginiń telegram arnasynda jáne "Zvezda" telearnasynyń saitynda jariialandy, dep habarlaidy Azattyq radiosy.
Evmenov jinalǵandarǵa kreiser dástúri saqtalyp, jalǵasatynyn aitty. Onyń aitýynsha, ofitserler quramy, jaldamalylar men michmandar flotta qyzmetin jalǵastyra beredi. Áskeri boryshyn ótep júrgender zańǵa sáikes, mindetten bosatylyp, tirkeýge turýǵa jiberiledi.
Videojazbada ekipajda qansha adamnyń bolǵany týraly derek aitylmaidy. Ádette jeke quramdy taratý kezinde komandir ekipaj quramyn jariialap, jaralanǵandar men qaza bolǵandar týraly aitýy tiis. Biraq "Novaia gazeta. Evropa" saity videojazbadaǵy alǵashqy kadrlarda dybys joq ekenine nazar aýdarǵan. Basylymnyń jazýynsha, alǵashqy kadrlardan "Moskva" komandiri Anton Kýprindi kórýge bolady. Osyǵan deiin Ýkraina shekara qyzmeti onyń qaza bolǵanyn habarlaǵan.
Resei qorǵanys ministrligi kreiser ekipajy tutas evakýatsiialanǵanyn habarlaǵan. Biraq Azattyqtyń Orys qyzmeti michman Ivan Vahrýshevtiń qaza bolǵanyn anyqtady. Jýrnalister onyń áieli Varvara Vahrýshevanyń "Odnoklassniki" jelisindegi akkaýntyn anyqtady. Onda áiel kúieýiniń qaza bolǵanyn habarlap, teńizshi formasyn kigen er adamnyń sýretin jariialady.
"Vkontakte" jelisinde jýrnalisterdiń suraqtaryna jaýap bergen Vahrýsheva kúieýi "Moskva" kreiseriniń batýy nátijesinde qaza bolǵanyn aitty. Ol jubaiynyń qaza bolǵanyn 14 sáýirde basshylyqtan estigen. Kúieýiniń denesi tabylǵan, biraq onyń qalai qaza bolǵany jaily málimet týystaryna aitylmaǵan. Áieldiń aitýynsha, "Moskva" ekipajynyń taǵy 27 múshesi iz-túzsiz joǵalǵan. Biraq bul aqparat ázirge resmi túrde rastalmady.
"Moskva" kemesine zymyranmen soqqy jasaǵanyn Ýkraina taraby 13 sáýirde málimdegen. 14 sáýirge qaraǵan túni Resei qorǵanys ministrligi kemede órt bolǵanyn rastady.
14 sáýirde kúndiz Pentogon da, Resei de kreiserdiń teńiz betinde ekenin habarlaǵan. Biraq birneshe saǵattan soń Resei qorǵanys ministrligi "keme teńizdegi daýyldan tepe-teńdik saqtai almai, batyp ketti" dep málimdedi. Máskeý órttin neden shyqqanyn aitpady.
Pentagondaǵy derekkóz kemege ýkrainalyq eki "Neptýn" zymyrany túskennen keiin sýǵa batyp ketkenin aitqan. Vashingtondaǵylar zymyran soqqysy men keme batqannan keiin adam shyǵyny bolǵanyna senimdi, biraq qansha teńizshi batyp ketkenin aita almady.
Aita keteiik, 15 sáýirge qaraǵan túni Resei "Neptýn" raketalaryn shyǵaratyn Kievtegi "Vizar" zaýytyna zymyranmen soqqy jasaǵan.
