Elordada «Aq jol» demokratiialyq partiiasynyń kezekten tys HIH sezi ótip jatyr. Onda partiia atynan Prezident sailaýyna qatysatyn úmitker anyqtalady, dep habarlaidy QazAqparat agenttigi.
«Keshe partiiamyzdyń ulttyq keńesiniń otyrysy ótti. Ulttyq keńesimizdiń músheleri kezekten tys Prezident sailaýyna «Aq jol» demokratiialyq partiiasynyń qatysýy týraly usynys jasady», - dedi «Aq jol» demokratiialyq partiiasynyń tóraǵasy Azat Perýashev.
Sezdegi ekinshi másele – partiia atynan osy sailaýǵa túsetin úmitkerdi tańdaý.
«Bul boiynsha ortaq kelisimge kelgen joqpyz. Sheshimdi qabyldaýǵa tek sezdiń ózi quzireti bar. Bul máseleni sizderdiń qaraýlaryńyzǵa shyǵaraiyq dep sheshtik. Bir partiia bolǵandyqtan, aramyzda túrli pikir bolsa da, partiiamyz atynan, quryltai qabyldaǵan sheshimdi qabyldap, bárimiz bul úmitkerge qyzmet etýge tiispiz dep bilemin. Sony saqtaýǵa sizderdi shaqyramyn», - dedi Azat Perýashev.
Onyń aitýynsha, Prezident Qasym-Jomart Toqaev kezekten tys sailaý jariialaǵaly partiia atynan 6 adam sailaýǵa túsýge niet bildirgen.
«Bul 6 adamnyń biri – iri biznesmen, bizdiń partiia atynan qatysqysy keldi, biraq pleným ony qoldamady. Taǵy bir kisi basynda qatysamyn dep, keiinnen qatyspaýdy uiǵardy. Taǵy bir adam ózi ulttyq keńeste usynys jasaldy, biraq sońynda bas tartty. Aiaǵynda úsh úzeńgilesimiz partiia atynan sailaýǵa qatysýǵa nietti», - dedi Azat Perýashev.
Úsh úmitkerdiń biri – jetisýlyq jýrnalist Sandýǵash Dúisenova, Májilis depýtaty Serik Erýbaev jáne «Aq jol» QDP Aqtóbe oblystyq filialynyń tóraǵasy, kásipker Asqar Sadyqov.
Ázirge el óńirlerinen jinalǵan júzden astam sezd delegattary úsh úmitkerdiń sózin tyńdap, óz suraqtaryn qoiyp jatyr.
«Odan bólek, ulttyq keńeste kei áriptesterimiz Prezidenttiń Pavlodarda aitqan sózin, onyń qoǵamdyq qozǵalystar atynan túsetinin estip, Prezidentti qoldaýdy da usyndy. Mundai pikirmen de sanasýymyz kerek», - dedi Azat Perýashev.
Eske sala ketsek, 2019 jyly 9 maýsymda eldegi Prezident sailaýyna «Aq jol» demokratiialyq partiiasy atynan Dániia Espaeva qatysqan edi. Qazaqstan sailaý tarihyndaǵy alǵashqy áiel-kandidat sailaýshylar daýsynyń 5,05 % jinady.
