Foto: gov.kz
Endi azamattar júrgizýshi kýáligin alý úshin emtihandy shekteýsiz tapsyra alady. Degenmen ár áreket arasyndaǵy aralyq keminde 10 kúntizbelik kún bolýy tiis. Bul týraly Úkimette júrgizýshi kýáligin berý rásimin jetildirýge arnalǵan keńeste aityldy, dep habarlaidy Ult.kz.
Qazirgi tártip boiynsha úmitkerlerge 3 tegin múmkindik beriledi: alǵashqy eki emtihan 1 kún aralyqpen tapsyrylady, al úshinshi múmkindik 30 kúnnen keiin beriledi. Atalǵan múmkindikter taýsylǵan jaǵdaida qaita oqýdan ótý talap etiletin. Jańa ózgerister osy júieni ikemdirek etýge baǵyttalǵan.
Keńes barysynda Ishki ister ministrligimen birlesip, emtihan protsesiniń ashyqtyǵyn arttyrý, ádildigin qamtamasyz etý, sybailas jemqorlyq táýekelderin azaitý jáne júrgizýshilerdi daiarlaý sapasyn kóterý máseleleri qaraldy.
Jańashyldyqtardyń biri – emtihandy aqyly túrde, shekteýsiz tapsyrý múmkindigi. Bul rette ár áreket arasynda 10 kúndik aralyq saqtalýy tiis.
Sonymen qatar akademiialyq adaldyqty qamtamasyz etetin tehnologiialardy engizý josparlanyp otyr. Ulttyq testileý ortalyǵy teoriialyq emtihan tapsyrmalaryna psihometriialyq taldaý júrgizip, olardyń shynaiy bilim men daǵdyny baǵalaý qabiletin tekseredi.
Emtihan protsesine jasandy intellekt tehnologiialaryn engizý de kózdelgen. Bul tyiym salynǵan qurylǵylardy paidalanýdy azaityp, buzýshylyqtardy naqty tirkeýge múmkindik beredi.
Tsifrlyq júielerdiń aqparattyq qaýipsizdigin kúsheitý de mańyzdy baǵyttardyń biri. Osy maqsatta olardy asa mańyzdy aqparattyq obektiler qataryna engizý qarastyrylyp otyr.
Sondai-aq emtihan erejesin buzǵandarǵa qatysty ákimshilik jaýapkershilik engiziledi. Bul talap úmitkerlerge de, zańsyz kómek kórsetetin tulǵalarǵa da qoldanylady. Quqyq buzýshylyq anyqtalǵan jaǵdaida teoriialyq emtihan tapsyrý quqyǵynan 1 jylǵa deiin aiyrý sharasy qarastyrylýy múmkin.
Budan bólek, avtomektepterdiń qyzmetine qoiylatyn talaptar kúsheitiledi. Olardyń jumysy júrgizýshilerdiń daiyndyq sapasy men azamattardyń keri bailanysy negizinde baǵalanady. Litsenziialaý júiesin engizý de josparlanǵan, al sapasyz daiarlaǵan jaǵdaida litsenziiadan aiyrý múmkindigi bar.
Jalpy alǵanda, jańa sharalar júrgizýshi kýáligin alý protsesin ashyq ári ádil etýge, artyq kedergilerdi azaitýǵa jáne jemqorlyq táýekelderin tómendetýge baǵyttalǵan.
