Júrgizýshi kýáligi, diplom jáne tehnikalyq tólqujat eGov mobildik qosymshasynda paida bolýy múmkin, – dep habarlaidy Tsifrlyq damý, innovatsiialar jáne aeroǵarysh ónerkásibi ministrliginiń baspasóz qyzmeti.
Tsifrlyq damý ministri Asqar Jumaǵalievtiń tóraǵalyǵymen ótken Memlekettik qyzmetterdi ońtailandyrý jáne avtomattandyrý jónindegi vedomstvoaralyq komissiianyń otyrysynda osyndai usynys aityldy.
«UAT» AQ Basqarma tóraǵasy Áset Turysov memlekettik organ ókilderine azamattardyń mobildik qosymshaǵa engizilgen qujattarynyń tizimin keńeitýdi usyndy.
«Búgingi kúni azamattar eGov mobildik qosymshasynan óziniń jeke kýáligin kóre alady. Eger ózimen birge jeke kýáliktiń túpnusqasy bolmaǵan jaǵdaida, mobildik qosymshadaǵy qujatty paidalana alar edi. Dál osyndai printsippen diplom, júrgizýshi kýáligi, tehnikalyq tólqujat jáne basqa da qujattardy ornalastyrýǵa bolady» , - dedi Áset Turysov .
Vedomstvoaralyq komissiianyń tóraǵasy, tsifrlyq damý ministri Asqar Jumaǵaliev bul ideiany júzege asyrýda memlekettik organdarǵa qoldaý kórsetýge daiyn ekenin bildirdi.
«Biz óz tarapymyzdan memlekettik organdarǵa barynsha qoldaý kórsetýge daiynbyz. Azamattyń barlyq qujattarynyń bir qosymshada ornalasýy óte yńǵaily bolar edi. Osyǵan orai, memlekettik uiymdardyń tsifrlyq qujattardy túpnusqamen teń dárejede qabyldaý máselesin sheshý qajet», - dedi ministr.
«Azamattarǵa arnalǵan úkimet» KEAQ Basqarma tóraǵasy Ásemgúl Baltasheva óz kezeginde, HQO-da azamattar jeke kýáliginiń túpnusqasyn usynbai-aq, ony eGov qosymshasy arqyly kórsete alatynyn aitty. Komissiia otyrysynda sondai-aq, aldaǵy jumys josparlary talqylanyp, memlekettik qoldaý jáne memlekettik qyzmetterdi avtomattandyrý sharalaryn merziminen keshiktirmeý, memlekettik organdardyń aqparattyq júielerin ýaqtyly integratsiialaý qajettigi aityldy. Tsifrlyq komissarlar kótergen máseleler de talqylandy.
Atap aitqanda, komissiia jeke kýálikti onlain aýystyrý qyzmetine basa nazar aýdardy. Qyzmetti onlain kórsetýden bas tartý kórsetkishiniń 80%-y paidalanýshylardyń sapasyz foto usynýyna bailanysty. Osy oraida, Asqar Jumaǵaliev qyzmet kórsetýshige bul máseleni sheshý joldaryn «UAT» AQ-men birlese pysyqtaýdy tapsyrdy.
«Áriptester, eger 100 ótinimniń 80-i fotonyń sapasyz bolýyna bailanysty qabyldanbaityn bolsa, onda bul máseleni sheshý qajet, anyqtaý kerek» , - dedi Jumaǵaliev.
Bul vedomstvoaralyq komissiianyń 57-shi otyrysy ekenin aityp ótken jón. Komissiia qabyldaǵan sheshimder men memlekettik organdar júrgizgen jumys nátijesinde 231 memlekettik qyzmet avtomattandyryldy jáne ońtailandyryldy. Osynyń esebinen talap etiletin qujattardyń ortasha paketi 30%-ǵa azaiyp, qyzmet kórsetýdiń ortasha merzimi 3 ese (31 kúnnen 10 kúnge deiin) qysqardy.
