Kardiologiia jáne ishki aýrýlar ǴZI dárigeri, meditsina ǵylymdarynyń kandidaty Gúlnar Úderbaeva júrektiń ishemiialyq aýrýynyń damý faktorlary men simptomdary týraly aityp berdi, dep habarlaidy QazAqparat.
Júrektiń ishemiialyq aýrýy – bul miokardtyń-júrek bulshyqetteriniń qanmen qamtamasyz etilýiniń jetkiliksizdigi. Oǵan ártúrli dárejedegi koronarlyq arteriialardyń aterosklerozy sebep bolady.
Kardiolog dárigerdiń aitýynsha, júrektiń ishemiialyq aýrýynyń damýynda holesterin deńgeiiniń joǵarylaýy sekildi faktorlar oryn alyp, aterosklerozdyń damýyna áser etedi jáne júrektiń ishemiialyq aýrýynyń bolý qaýpin 2-5 esege arttyrady.
«Arteriialyq qan qysymynyń joǵarylaýy júrektiń ishemiialyq aýrýynyń damý yqtimaldyǵyn 2-6 esege arttyrady. Al, temeki shegý 1,5-6 esege joǵarlatady. Gipodinamiia men semizdik — belsendi ómir súretinderge qaraǵanda dene qimyly az adamdardyń júrektiń ishemiialyq aýrýyna shaldyǵýy 3 esege joǵary bolady. Qant diabeti ishemiialyq aýrýǵa shaldyǵý qaýpin 2-4 esege arttyrady», - deidi Gúlnar Úderbaeva.
Júrektiń ishemiialyq aýrýy kezinde durys tamaqtaný qajet. Taǵamnyń quramynda aqýyz, mailar, kómirsý, mikroelementter bolǵan abzal. Holesterin, mai men tuzy az ónimderdi paidalanǵan jón.
Sonymen qatar, dárger as mázirine erekshe nazar aýdarý kerektigin tilge tiek etti.
Atap aitsaq:
- teńiz taǵamdary men kókserke, nálim, alabuǵany siiaqty balyq túrlerin;
- ósimdik maiy qosylǵan kez kelgen kókónis salattaryn;
- maisyz et túrleri – kúrketaýyq, jas siyr, qoian etterin;
- ashyǵan sút ónimderi – mailylyǵy tómen airan, qaimaq, irimshik, sonymen qatar kez kelgen qatty jáne jumsaq tuzsyz jáne ashy emes irimshikter;
- kez kelgen jemis-jidekter jáne olardan jasalǵan taǵamdar;
- jumyrtqanyń sarysy – aptasyna keminde 4 danadan aspaýy tiis, bódene jumyrtqasy – aptasyna keminde 5 danadan artyq emes;
- jarma jáne kúrishten basqa, kez kelgen botqa túrlerin qosýdy usynady.
Kardiolog et, balyq, konditer ónimderin, qant, jarma men kúrishten jasalǵan taǵamdar, ashy jáne tuzdalǵan taǵamdar, sondai-aq shokolad, kofe, kakaony tutynýdy azaitý kerektigin aitty.
«Júrektiń ishemiialyq aýrýynda kúnine 5-7 ret tamaqtanǵan durys. Júrek jumysy jaǵynan bolatyn azdaǵan ózgeristerge kóńil aýdarǵan jón. Mysaly, álsin-álsin qol, jaýyryn nemese moiynǵa beriletin keýde artynda, keýdeniń sol jaq jartysynda paida bolatyn aýyrýdyń sezilýi, keýdeniń qysýy men aýanyń jetispeýshiligi, jalpy álsizdik, sondai-aq keýdeniń syzdap aýyrýy, júrektiń ainýy men qusý bul júrek aýrýynyń simptomdary», - deidi kardiolog.
