Foto: pexels
Jelide túrkistandyq 15 jastaǵy mektep oqýshysyn qatarlastary uryp óltirgeni týraly aqparat tarady, dep habarlaidy Ult.kz.
Jagdai kz telegram arnasynyń jazýy boiynsha jasóspirimdi zirat mańyna aldap shaqyryp, sol jerde qatygezdikpen uryp-soqqan. Júregine tigen soqqylardan ol sol sátte kóz jumǵan.
«Olar tórteý bolǵan. Kezek-kezek uryp, segiz ret soqqy jasaǵan. Barlyq soqqy júrek tusyna tigen. Olar dál sol jerdi ǵana urǵan, júregi toqtaǵansha. Júregi jarylyp ketken. Uiqy bezi de janshylyp, jarylyp ketken. Ol birden kóz jumdy. Keiin olar bizge onyń tek esinen tanyp qalǵanyn aitýǵa tyrysty. Men kelgen kezde inim shamamen qyryq minýt buryn qaitys bolyp ketken edi», – deidi marqumnyń aǵasy.
Týystarynyń aitýynsha, balany birneshe ai boiy qorqytyp, aqsha bopsalap kelgen. Ol ákesiz ósken, fizikaǵa qyzyǵyp, UQK qyzmetkeri bolýdy armandaǵan.
Politsiia qylmystyq is qozǵady. Otbasy kinálilerdiń jazalanýyn talap etýde.
