Birinshi jartyjyldyqtyń qorytyndysy boiynsha 42 myńnan astam adam jumysynan aiyrylýyna bailanysty Memlekettik áleýmettik saqtandyrý qorynan tólemder aldy. Bul týraly QR Eńbek jáne halyqty áleýmettik qorǵaý ministrliginiń baspasóz qyzmeti málim etti.
Baspasóz qyzmeti taratqan málimetterge qaraǵanda, biylǵy jyldyń qańtar aiynan maýsym aiyna deiin Memlekettik áleýmettik saqtandyrý qorynan (budan ári – MÁSQ) jumysynan aiyrylǵan jaǵdaida tólenetin áleýmettik tólemderdi alýshylardyń sany 42,3 myń adamdy qurady. Bul rette 6,5 myń azamatqa tólem aǵymdaǵy jyldyń maýsymynda taǵaiyndalǵan. Qoldanystaǵy zańnamaǵa sáikes jumystan bosatylǵan qyzmetkerler mindetti áleýmettik saqtandyrý júiesine qatysý ótiline jáne sońǵy 24 aidaǵy tabysyna bailanysty 1 aidan 6 aiǵa deiin jumysynan airylýy boiynsha áleýmettik tólemder alady. Tólem joǵalǵan kiristiń 40%-yna deiingi mólsherde MÁSQ qarajaty esebinen júzege asyrylady.
Tólem taǵaiyndaý úshin jumystan bosatylǵan qyzmetkerge:
- Egov.kz portalynda avtorizatsiialaný;
- «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaý;
- Onlain-qyzmetke tapsyrys berip, barlyq joldardy toltyrý jáne oǵan ETsQ-men qol qoiyp, ótinimdi jiberý qajet;
- Bir kún ishinde turǵylyqty jerińizdegi halyqty jumyspen qamtý ortalyǵy (budan ári – HJQO) bos jumys oryndaryn usynady;
- Eger jumys tabylmasa, 3 jumys kúni ishinde qashyqtan jumyssyz mártebesi beriletin bolady (qajet bolǵan jaǵdaida qosymsha aqparat jinaý úshin sizge HJQO qyzmetkeri habarlasady);
Jumyssyz retinde tirkelý týraly málimetter bolǵan kezde Eńbekmininiń aqparattyq júiesi proaktivti formatta MÁSQ-tan tólemdi taǵaiyndaý boiynsha qyzmet kórsetýge kelisý úshin mobildi telefonǵa SMS-habarlama jiberedi. Kelisken jaǵdaida SMS-habarlamaǵa jaýap berý qajet. Tólem avtomatty túrde taǵaiyndalady. Esterińizge sala keteiik, MÁSQ qarajaty esebinen jumysynan aiyrylǵan jaǵdaida tólenetin áleýmettik tólem jumystan shyǵý sebepterine qaramastan júzege asyrylady jáne jumyssyz adam jumys izdegen kezeńde ony qoldaýǵa arnalǵan.
