Elimizde infraqurylymdyq jobalar aiasynda 13 myńǵa jýyq azamat jumysqa ornalasty, dep habarlaidy "Ult aqparat" «Eńbek resýrstaryn damytý ortalyǵy» AQ baspasóz qyzmetine silteme jasap.
Qazaqstanda «Jumys oryndaryn qurýdyń integratsiialanǵan kartasy» aqparattyq júiesi iske qosyldy. Ol eldi meken, jobalar, kásiporyndar, ekonomikanyń salalary men memlekettik baǵdarlamalar boiynsha jumysqa ornalasý kórsetkishine sapaly monitoring júrgizýge múmkindik beredi.
QR Eńbek jáne halyqty áleýmettik qorǵaý ministrliginiń jańa aqparattyq júiesi jumys oryndaryn qurý serpinin dál kórsetedi, sondai-aq 2020-2021 jyldarǵa arnalǵan Jumyspen qamtýdyń jol kartasy men basqa da memlekettik baǵdarlamalardyń tiimdiligin jańasha baǵalaýdy engizedi.
Aqparattyq júieniń 18 mamyrdaǵy málimetinshe, óńirlerde 3,6 myńǵa jýyq joba júzege asyrylýda. Onyń jartysynan kóbi - Jumyspen qamtý jol kartasyna engen jobalar.
Búginde 41 myńǵa jýyq jumys orny quryldy (jospardyń 16%). 12,9 myń adam jumysqa ornalasty. Onyń 4,6 myńy - burynnan jumyssyz, myńnan astamy - ózin-ózi jumyspen qamtyǵandar bolǵan. Al, qalǵan 7,2 myńy - jumys izdeýshiler.
Jumyspen qamtylǵan azamattardyń 4,1 myńy - jastar (31%), myńnan astamy – az qamtylǵandar (7,9%) jáne 300-den astamy - múmkindigi shekteýli jandar (2,5%).
Jumyspen qamtý Jol kartasy jobalaryn belsendi júzege asyrý boiynsha Shyǵys Qazaqstan (722) jáne Almaty (715) oblysy aldyńǵy orynda. Sáikesinshe, bul óńirler qurylǵan jumys oryndarynyń sany (5 myńnan astam), sondai-aq adamdardy jumysqa ornalastyrý keisteri (2,5 myńnan astam adam) boiynsha kósh bastap tur.
Jol kartasy aiasynda eń kóp joba Almaty oblysynda (977 joba), Shyǵys Qazaqstan (813) jáne Jambyl (690) oblysynda júzege asyrylady. Al, eń kóp jańa jumys oryndary Almaty qalasynda (26 myń), Túrkistan oblysy (22 myń) jáne Almaty oblysynda (21 myń) ashylady dep kútilýde.
Esterińizge salsaq, 2020 jyldyń naýryz aiynda Premer-Ministr buiryǵymen «2020-2021 jyldarǵa arnalǵan Jumyspen qamtýdyń jol kartasy» bekitildi.
255 myńnan astam azamatty jumysqa ornalastyrý úshin 4 baǵyt boiynsha 6,5 myń infraqurylymdyq jobaǵa jumys orny uiymdastyrylady.
2020-2021 jyldarǵa arnalǵan Jumyspen qamtýdyń jol kartasynyń sharttary boiynsha qyzmetkerlerdiń jartysy Halyqty jumyspen qamtý ortalyqtary arqyly tartylýy tiis. Jumysqa alý kezinde jumyssyz jastarǵa basymdyq beriledi. Sondai-aq, qatysýshylardyń jalaqy mólsheri boiynsha shart bar – ol 85 myń teńge jáne odan kóp bolýy tiis.
