Eńbek jáne halyqty áleýmettik qorǵaý ministrligi 17 qarashadan bastap respýblikalyq mańyzy bar qalalar men oblys ortalyqtarynyń turǵyndary úshin testi rejimde halyqty jumyspen qamtý qashyqtyqtan qyzmet kórsetý fýnktsionalyn iske qosty, dep habarlaidy "Ult aqparat" Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Qazaqstandyqtar Elektrondy eńbek birjasyndaǵy «jeke kabinetinde» jumys izdep júrgen adam nemese jumyssyz retinde esepke tura alady, memleket sýbsidiialaityn bos jumys oryndaryn óz betinshe tańdai alady jáne t. b.
Joǵaryda kórsetilgen qyzmetterdi onlain rejimde alý úshin elektrondyq tsifrlyq qoltańbany paidalana otyryp, EEB-da tirkelý qajet.
«Elektrondyq eńbek birjasyndaǵy pilottyq joba jumyssyzdardy tirkeý rásimderin jeńildetý jáne jumyspen qamtýdy qoldaý boiynsha memlekettik qyzmetterdi, onyń ishinde jumysynan aiyrylý boiynsha áleýmettik tólemderdi alýdy jeńildetý úshin iske qosyldy. Endi barlyǵyn tek internet, kompiýter jáne elektrondyq tsifrlyq qoltańbanyń kómegimen jasaýǵa bolady», – dep habarlady «Eńbek resýrstaryn damytý ortalyǵy» AQ prezidenti Dáýlet Arǵyndyqov.
Internet nemese kompiýter bolmaǵan jaǵdaida qyzmetterdi HJQO-da ózine-ózi qyzmet kórsetý aimaǵyn paidalana otyryp alýǵa bolady. Bul azamattarǵa halyqty jumyspen qamtý ortalyǵynyń mamanyna qabyldaýǵa kezek kútpeýge jáne COVID-19 pandemiiasy jaǵdaiynda tike bailanysty azaitýǵa múmkindik beredi.
«Qyzmet tolyqtai avtomattandyrylǵan. Bul degenimiz, eger portal úsh jumys kúni ishinde adamǵa laiyqty jumys taba almasa, onda Elektrondyq eńbek birjasy jumyssyz retinde avtomatty túrde tirkeidi. Osylaisha, adam faktory tolyǵymen alyp tastalady», – dedi Dáýlet Arǵyndyqov.
«Jeke kabinette» qazaqstandyqtar ózderiniń tirkelý kezeńderin qadaǵalai alady. Jumyssyz mártebesin alǵannan keiin azamattar onlain-rejimde EEB-da jumysynan aiyrylý boiynsha áleýmettik tólemge ótinim bere alady jáne memleket sýbsidiialaityn jumys oryndaryn – jastar praktikasynda, áleýmettik jumys oryndarynda, qoǵamdyq jumysta bos jumys oryndaryn óz betinshe tańdai alady.
Jumys izdep júrgen adam, jumyssyz retinde tirkeý, memleket sýbsidiialaityn jumys oryndaryna jiberý, jumysynan aiyrylý boiynsha áleýmettik tólem alý boiynsha qyzmet kórsetý týraly tolyǵyraq EEB portalynan nemese halyqty jumyspen qamtý ortalyǵynan bilýge bolady.
Eske sala ketsek, Úkimet otyrysynda QR Eńbek jáne halyqty áleýmettik qorǵaý ministri Birjan Nurymbetov 2022 jyly áleýmettik-eńbek salasyndaǵy qyzmetterdiń 93 paiyzy elektrondy bolady dep málim etti.
