Memleket jumysqa ornalastyrý boiynsha aýtsorsingtik qyzmet kórsetýge niet bildirgen kompaniialarǵa jáne jeke tulǵalarǵa bir jumyssyz azamat úshin 35 myńnan 52,5 myń teńgege deiin qarjy tóleýge daiyn, dep habarlaidy "Ult aqparat".
«Eki jyldan beri memleket jumys izdeý jáne jumyssyzdardy eńbekke ornalastyrý boiynsha aýtsorsingtik qyzmet kórsetetin jeke HR-agenttikterdi tartýda. Jumysqa sátti ornalastyrylǵan árbir adam úshin 35 myń teńgeden 52,5 myń teńgege deiin tólenedi. Biraq kóptegen adamdar tipti, jeke tulǵalar osylai tabys tabýǵa bolatynyn bilmeidi.
«Halyqty jumyspen qamtý týraly» Zańǵa sáikes aýtsorsingtik qyzmet kórsetýge qatysatyn úmitkerlerge birdei talaptar qoiylady. Zańdy jáne jeke tulǵalardyń tiisti jumys tájiribesi, sondai-aq qajetti materialdyq jáne eńbek resýrstary bolýy tiis. Al, jeke tulǵalardyń tek bir ǵana jaldamaly qyzmetkeri jáne Jeke kásipkerlik týraly tirkeýi bolsa jetkilikti», - deidi «Eńbek resýrstaryn damytý ortalyǵy» AQ-dan.
Aýtsorsing qatysýshylary memleketten birqatar tiimdi usynystar men artyqshylyqtardy ala alady:
- memlekettik jumyspen qamtý ortalyǵynyń mamandary jan-jaqty qoldaý kórsetedi;
- halyqty jumyspen qamtý ortalyǵy jumyssyzdar týraly tolyq aqparat beredi;
- elektrondy formatta halyqty jumyspen qamtý ortalyǵymen aýtsorsing týraly shartty «Elektrondyq eńbek birjasynda» (www.enbek.kz) jasai alady;
- aýtsorsingtik qyzmet kórsetý aiasynda jumyssyzdardy jumysqa ornalastyrý úshin kepildi tólem alady;
- «Elektrondyq eńbek birjasy» portalyndaǵy bos jumys oryndaryn sheksiz paidalana alady.
«Halyqty jumyspen qamtý salasynda aýtsorsingtik qyzmet kórsetý jańa biznesti bastaǵysy keletinderge tamasha múmkindik. Óitkeni qatysý úshin az qarjy jumsalady. Shart boiynsha aýtsorsingtik qyzmet kórsetetin agenttik nemese jeke kásipker (JK) 30 jumys kún ishinde bos jumys ornyn izdep tabýy kerek. Aýtsorsing arqyly jumysqa ornalasqan azamattar alty aidan kem emes úzdiksiz jumys isteýi tiis», - dedi «Eńbek resýrstaryn damytý ortalyǵy» AQ Jumyspen qamtý qyzmetin damytý departamentiniń direktory Irina Rýbashina.
Onyń aitýynsha, azamattardy jumysqa ornalastyrǵany úshin memleket aqy tóleýge kepildik beredi. Tarif kólemi 35 000 teńgeden 52 500 teńge aralyǵynda. Qarjy kólemi jumyssyzdyń jumysqa ornalasý qiyndyǵyna jáne onyń qala nemese aýyldyq jumyspen qamtý ortalyǵynda tirkelgen ornyna bailanysty bolady.
«Aýtsorsingtik qyzmet kórsetetin kompaniialar ne jeke tulǵalardyń tirkelý ornyna eshqandai talaptar qoiylmaidy. Iaǵni jeke agenttikter birneshe óńirde jáne aýtsorsing týraly birneshe kelisimshart boiynsha qyzmet kórsete alady», – dep tolyqtyrdy I. Rýbashina.
Aýtsorsing máseleleri boiynsha jaqyn jerde ornalasqan halyqty jumyspen qamtý ortalyǵyna nemese «Eńbek resýrstaryn damytý ortalyǵy» AQ-ǵa habarlasýǵa bolady.
