Ánshi Qaraqat Ábildina áleýmettik jelidegi paraqshasynda marqum anasyn eske alyp, odan boiyna sińgen erekshe ádeti týraly bólisti. Óner iesiniń sózinshe, úi gúlderin ósirý búginde onyń janyn tynyshtandyratyn súiikti isteriniń birine ainalǵan, dep habarlaidy ult.kz.
Ánshi bala kúninde aýyldaǵy úileriniń terezeleri únemi jaiqalǵan gúlderge tolyp turatynyn eske aldy. Anasy ósimdikterdiń árqaisysyna erekshe kútim jasap, tipti olarmen sóilesip otyratyn bolǵan.
Qaraqat Ábildinanyń aitýynsha, anasy gúldi erekshe jaqsy kórgen. Qai jerde júrse de ádemi ósimdik kórse, birden qyzyǵýshylyq tanytatyn. Tipti aýrýhanada jatqan keziniń ózinde dálizdegi gúlderdiń janynan beijai óte almai, úiinde joq ósimdiktiń bir butaǵyn alyp, kóbeitý úshin jinap júretin bolǵan.
Óner iesi anasymen bolǵan ázilge toly bir oqiǵany da eske aldy. Birde ol anasyna qoǵamdyq orynda kameralar baryn aityp, jurt ony Qaraqattyń anasy gúl alyp júr dep sóz etýi múmkin ekenin eskertken. Alaida anasy buǵan ázilmen jaýap berip, gúldiń tuqymyn surap almaitynyn jáne sol úshin jaýapqa tartsa da qoryqpaitynyn aitqan.
Qazir ánshi úiindegi gúlderge kútim jasaǵan saiyn anasyn eske alatynyn jetkizdi. Onyń sózinshe, gúl ósirý ózi úshin qarapaiym hobbi ǵana emes, janyn tynyshtandyratyn ári anasymen rýhani bailanystyryp turǵan erekshe dúnie.
Aita keteiik, Qaraqat Ábildina Móldir Muqandy qoldaimyn dep synnyń astynda qaldy.
Qaraqat Ábildina kim?
Qaraqat Ábildina – qazaqstandyq ánshi, dástúrli jáne estradalyq ánderdiń oryndaýshysy, Qazaqstannyń eńbek sińirgen qairatkeri. Ol 1978 jyly Qaraǵandy oblysy Jańaarqa aýdanynda dúniege kelgen.
Óner iesi Qurmanǵazy atyndaǵy Almaty memlekettik konservatoriiasynda “Dombyramen halyqtyq án aitý” mamandyǵy boiynsha bilim alǵan. Keiin oryndaýshylyq sheberlik boiynsha aspirantýrada Qazaqstannyń halyq ártisi Qairat Baibosynovtan tálim aldy.
Qaraqat Ábildina qazaqtyń dástúrli ánderin nasihattap, Nartai Bekejanovtyń mýzykalyq murasyn oryndap keledi. 2001 jyly “Shabyt” halyqaralyq baiqaýynyń diplomanty, 2005 jyly Qazaqstan Jastar odaǵy syilyǵynyń laýreaty atandy. 2013 jyly oǵan “Qazaqstannyń eńbek sińirgen qairatkeri” qurmetti ataǵy berildi.
Ánshiniń jubaiy – belgili prodiýser ári ánshi Qydyráli Bolmanov.
