Foto: Májilistiń baspasóz qyzmeti
Májilis spikeri otyrys barysynda depýtat Baqytjan Bazarbekke eskertý jasady, dep habarlaidy Kazinform agenttigi.
«Jalyndy sálemimdi Tamara Dúisenqyzyna joldaimyn. Bir-eki jyl buryn Prezidenttiń kómekshisi bolyp turǵan kezińizde sizben videokonferentsiiaǵa shyqqanbyz. Sonda SQO Bostandyq degen aýyl bar. Aýyl turǵyndary jaiylymdyq jerlerinen aiyrylyp qalǵan. Siz jeke maǵan jáne aýyl turǵyndaryna ýádeni tógip-tógip bergensiz. Mine, endi áp-ádemi, túk bilmegendei ministrdiń qyzmetine otyrdyńyz. Sondyqtan myna jerde osy múmkindikti paidalanyp sizge aýyl turǵyndarynyń jalyndy sálemin jetkizip otyrmyn», — dedi Májilis depýtaty Baqytjan Bazarbek jalpy otyrysta.
Sondai-aq, halyq qalaýlysy Aýyl sharýashylyǵy ministrligine saýal joldady.
«Eger jumys istei almasańyzdar, ministrmen qosa ministrlikten qýyp shyǵamyz», — dedi ol Aýyl sharýashylyǵy vitse-ministri Ábilhaiyr Tamabekke qaratyp.
Óz kezeginde Májilis spikeri Erlan Qoshanov depýtatqa reglamentti buzbaýyn surap, eskertý jasady.
«Qurmetti Baqytjan Jumabekuly! Birinshi kezekte depýtattyq etika degen bar. Siz qatty ketpeńiz! Agressiiasyz sóileńiz. Ekinshiden, men jaqtap otyrǵanym joq. Qoiyp otyrǵan suraǵyńyz durys. 10 mln gektarǵa jýyq jer qaitaryldy. Bul — birinshi kezekte „Jer amanaty“ komissiiasynyń jumysy. Endi ony ári qarai bólý kezinde ádil bólinip jatyr ma, joq pa — sol ǵoi sizdiń suraǵyńyz. Ol — eń aldymen jergilikti ákimderdiń, ekinshi kezekte osy quzyretti organdardyń máselesi, solardyń jaýapkershiligi. Ekinshiden, „Jer amanaty“ komissiiasynyń quramyna Bas prokýratýra da, Aýyl sharýashylyǵy ministrliginiń basshylyǵy, jer resýrstary komitetiniń basshysy, depýtattar, sonymen qatar qoǵamdyq belsendiler, qoǵam ókilderi de kiredi. Onyń basshysynyń biri ózińiz. Sondyqtan men de sizge jalyndy sálem aitqym keledi. „Jer amanaty“ komissiiasy da osy máselege qatysty ar jaǵynda qalai ádil bólinip jatyr, sony qadaǵalaýǵa, baqylaýǵa búkil quzireti bar. Bul máseleni jergilikti bilik ókilderi de, ministrlik te qaraýy kerek. Komissiia da jaýapty. Biraq suraq qoiǵanda, Baqytjan Jumabekuly, bul birinshi ret emes, sizge suraq qoiǵanda reglamentti qamtamasyz etetin palatanyń basshysy retinde eskertý jasaimyn», — dedi ol.
