Almatyda QR Premer-Ministriniń orynbasary Berdibek Saparbaev múgedekterdi áleýmettik qorǵaý salasyndaǵy úilestirý keńesiniń kóshpeli otyrysyn ótkizdi. Onyń barysynda túrli máseleler talqylandy, dep habarlaidy "Ult aqparat".
Kóshpeli otyrysqa, eńbek jáne halyqty áleýmettik qorǵaý ministri Birjan Nurymbetov, bala quqyqtary jónindegi ýákil Arýjan Sain, ortalyq jáne jergilikti atqarýshy memlekettik organdar, úkimettik emes sektordyń ókilderi, múgedekterdiń qoǵamdyq birlestikteriniń músheleri men ońaltýdyń tehnikalyq quraldaryn óndirýshiler qatysty.
«Qazaqstanda shamamen 690 myń múgedek turady, olardyń 90 myńǵa jýyǵy balalar. Osy jyldyń mamyr aiynda múgedekterdiń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deiin ulttyq jospar qabyldandy. Ulttyq jospardyń mindetteriniń biri - jumyspen qamtamasyz etý. Búgingi tańda múgedekterdiń 67 paiyzy iaǵni 424 myń adam eńbekke qabiletti jasta. Alaida, onyń tek 106,5 myńy nemese 25 paiyzy ǵana eńbekke tartylǵan. Jumys berýshiler múgedekterdi jumysqa ornalastyrý kvotasyn oryndamai otyr», - dedi Saparbaev.
Osyǵan bailanysty ol múmkindigi shekteýli azamattardyń ómiri men jumysyna qolaily jaǵdai týǵyzý úshin memleket pen biznestiń kúsh-jigerin birlesip jumsaýǵa shaqyrdy.
Eńbek ministri B.Nurymbetovtiń málimetinshe, ekonomikalyq yntymaqtastyq pen damý uiymy (EYDU) elderinde múgedekterdi jumysqa ornalastyrý deńgeii shamamen 40 paiyzdy quraidy. «Eńbek» memlekettik baǵdarlamasy aiasynda 47 myń múmkindigi shekteýli adamǵa qoldaý kórsetildi, onyń ishinde 40 myń adam jumysqa ornalastyryldy, 900 mikrokredit berildi.
«2020-2021 jyldary bul kórsetkishti 30 paiyzǵa jetkizý mindeti tur. Ol úshin qosymsha 20 myń adamdy jumyspen qamtý qajet», - dep atap ótti B.Nurymbetov.
Sondai-aq, jiynda múgedektikti taǵaiyndaý rásimderi kezinde sybailas jemqorlyqty joiý týraly másele talqylandy.
«Ókinishke qarai, biz jemqorlyqtyń baryn ashyq moiyndaýymyz kerek. Sybailas jemqorlyq táýekelderin boldyrmaý úshin biz syrttai kýálandyrý tártibin engizýdi josparlap otyrmyz. Ol úshin eki ministrliktiń aqparattyq bazasyn biriktirý qajet. Bul joba pilottyq rejimde elimizdiń birneshe aimaǵynda júzege asyrylýda. Eńbek jáne halyqty áleýmettik qorǵaý jáne densaýlyq saqtaý ministrlikteri bul protsesti tezdetýi kerek», - dedi QR Premer-Ministriniń orynbasary Berdibek Saparbaev.
Sonymen qatar, múgedektiktiń aldyn-alý, olardy kásipkerlikke tartý, ońaltý ortalyqtaryn qurý, bilim alýǵa, áleýmettik mańyzdy nysandarǵa qol jetimdilik, áleýmettik qyzmetter portalyn qurý, ońaltý quraldarymen qamtamasyz etý jáne basqa da máseleler qaraldy.
Aita ketý kerek, úilestirý keńesiniń aiasynda tehnikalyq ońaltý jabdyqtarynyń kórmesi ótti, oǵan otandyq óndirýshiler qatysty.
