Halyq demografiiasy» qoǵamdyq birlestigi QR Prezidenti laýazymyna úmitker retinde Jumatai Álievti usyndy, dep habarlaidy "Ult aqparat" QR Ortalyq sailaý komissiiasyna silteme jasap.
«2019 jylǵy 28 sáýirde QR Ortalyq sailaý komissiiasyna «Qazaqstan Respýblikasyndaǵy sailaý týraly» QR Konstitýtsiialyq zańynyń 55-babyna sáikes «Halyq demografiiasy» qoǵamdyq birlestigi Qazaqstan Respýblikasynyń Prezidenttigine kandidat retinde Jumatai Áliuly Álievtiń qujattaryn usyndy», - delingen OSK-nyń resmi saitynda.
Birlestik Ortalyq sailaý komissiiasyna tómendegi qujattardy tapsyrǵan:
1. «Halyq demografiiasy» qoǵamdyq birlestigi joǵary organynyń QR Prezidenttigine kandidatty usyný jónindegi otyrysynyń hattamasynan úzindi;
2. Jumatai Áliuly Álievtiń QR Prezidenttigine kandidat retinde sailaýǵa túsýge kelisim bergeni týraly ótinishi;
3. Ómirbaiandyq derekteri;
4. QR Ortalyq sailaý komissiiasynyń shotyna sailaý jarnasyn engizgenin kýálandyratyn qujat;
5. Jeke basyn kýálandyratyn qujattyń kóshirmesi;
6. Joǵary oqý ornyndaǵy bilimi týraly diplomdarynyń kóshirmeleri;
7. Memlekettik qyzmette jumys tájiribesiniń bar ekenin rastaityn qujattar.
Jumatai Áliev 1952 jyldyń 20 maýsymynda Jambyl oblysynda dúniege kelgen. Leningrad memlekettik ýniversitetin, Almaty halyq sharýashylyǵy institýtyn bitirgen, filosof, ekonomist. Filosofiia ǵylymdarynyń doktory, professor, Qazaqstan Respýblikasy UǴA akademigi.
Ýniversitetti bitirgennen keiin Almaty memlekettik meditsina institýtynda muǵalim bolyp eńbek etken.
1977-1982 jyldary QLKJO Almaty qalalyq komitetiniń nusqaýshysy, QLKJO Frýnze aýdandyq komitetiniń ekinshi hatshysy, QKP Alataý aýdandyq partiia komitetiniń nusqaýshysy qyzmetterin atqarǵan.
1982-1983 jj. - Almaty qalalyq sút zaýytynda aǵa tehnolog- injener, bas injenerdiń orynbasary.
1983-1997 jj. - Almaty sáýlet jáne qurylys institýtynda aǵa oqytýshy, Almaty mal dárigerlik institýtynyń áleýmettik-ekonomika pánderi kafedrasynyń meńgerýshisi, QazMAÝ gýmanitarlyq daiarlaý ortalyǵynyń basshysy.
1997-2001 jj. - Ortalyq Aziia ýniversitetiniń prezidenti, rektory.
2001-2008 jj. - Qazaqstan Respýblikasy Prezidenti Ákimshiliginiń Qazaqstan halqy Assambleiasy hatshylyǵynyń meńgerýshisi, Qazaqstan halqy Assambleiasy tóraǵasynyń orynbasary.
2008-2012 jj. - Ortalyq Aziia ýniversitetiniń qamqorshy keńesiniń tóraǵasy, professor, «Turaqty Qazaqstan» qoǵamdyq qorynyń basshysy.
2012 jyldyń qańtarynan bastap - besinshi sailanǵan Qazaqstan Respýblikasynyń Parlamenti Májilisiniń depýtaty. Qazaqstan halqy Assambleiasynan sailanǵan.
III, II dárejeli «Barys» ordenderimen marapattalǵan.
Nemis, aǵylshyn, orys, qazaq tilderin biledi.
