«Halyq demografiiasy» qoǵamdyq birlestiginen prezidenttikke úmitker retinde usynylǵan Jumatai Áliev Ortalyq sailaý komissiiasynyń sheshimine apelliatsiia bere alady. Bul jaiynda búgin QR OSK múshesi Lázzat Súleimen aitty, dep habarlaidy QazAqparat tilshisi.
Qazirgi ýaqytta men onyń (prezidenttikke kandidat retinde usynylǵan Jumatai Áliev - red.) lingvistikalyq komissiia sheshimimen kelisetindigin ne kelispeitindigin aita almaimyn. Ol jaiynda ózi aita jatar. Jalpy, Ortalyq sailaý komissiiasynyń kez kelgen sheshimine qarsy shaǵym jasaýǵa bolady. 10 kúnniń ishinde sotqa shaǵym berýge ol kisiniń de quqyǵy bar. Lingvistikalyq komissiia kandidatqa úmitker memlekettik tildi erkin meńgergen nemese meńgermegen dep qana baǵa bere alady», - dedi Lázzat Súleimen.
Aita keteiik, búgin «Halyq demografiiasy» qoǵamdyq birlestigi Qazaqstan Respýblikasynyń Prezidenttigine kandidat retinde usynǵan Jumatai Áliev memlekettik tilden emtihan tapsyrdy. Nátijesinde QR Prezidenttigine kandidattyń memlekettik tildi meńgerý deńgeiin anyqtaityn lingvistikalyq komissiia onyń memlekettik tildi erkin meńgermegendigin anyqtady.
Osyǵan orai QR Ortalyq sailaý komissiiasy «Halyq demografiiasy» qoǵamdyq birlestiginen prezidenttikke úmitker retinde usynylǵan Jumatai Álievti kandidat retinde tirkeýden bas tartty.
