27 tamyzda Premer-Ministrdiń orynbasary – saýda jáne integratsiia ministri Serik Jumanǵarin otandyq qant zaýyttary, sala qaýymdastyqtary, saýda birjalary ókilderimen, treiderlermen jáne konsýltanttarmen qant jáne basqa da azyq-túlik ónimderiniń baǵasyn turaqtandyrý jáne onyń ósý qarqyny boiynsha birlesken sheshimderdi talqylaý jáne ázirleý úshin kezdesti, dep habarlaidy Úkimet basshysynyń baspasóz qyzmeti.
Talqylanǵan basty taqyryp – baǵa turaqtandyrý jáne elde qant tapshylyǵyn boldyrmaý. Kezdesýde qazaqstandyq qant, tamaq jáne qaita óńdeý ónerkásibi qaýymdastyǵynyń prezidenti Aijan Naýryzǵalieva atap ótkendei, negizgi eksporttaýshy elderdiń qant eksportyna qabyldaǵan shekteý sharalary ishki naryqta dúrligýge alyp keldi, biraq búgingi tańda jaǵdai turaqtandy.
«Biz birlesip, zaýyttardy shikizatpen, al eldi osy ónimmen turaqty baǵada qamtamasyz etý úshin qantty qarjylandyrý, qaita óńdeýdi uiymdastyrý jáne satý shemalaryn qaita qarap, ázirleimiz. Men muny aldaǵy kúnderi jasaýdy usynamyn», — dedi Serik Jumanǵarin.
Qant salasy boiynsha keńeske qatysýshylar bul usynysty qoldady.
Sondai-aq bul kúni Serik Jumanǵarin negizgi tamaq ónimderi óndirisiniń basqa salalarynyń problemalary men damý múmkindikterin talqylaý úshin Et odaǵynyń, baǵbandar odaǵynyń, astyq óńdeýshiler odaqtarynyń, organikalyq ónim óndirýshilerdiń jáne basqa da agrarlyq sarapshylardyń ókilderimen kezdesýler ótkizdi. Qatysýshylar tarapynan kóptegen usynystar aityldy, óndiristiń árbir baǵytyn pysyqtaý úshin qosymsha kezdesýler ótkizý týraly sheshim qabyldandy.
