Senator Baqytjan Jumaǵulov ǵylymdy damytýda qandai máselelerge nazar aýdarylýy kerektigin aityp berdi, dep habarlaidy "Ult aqparat".
«Bárimiz ǵylymdy damytýdaǵy ǵalymdardyń jeke rólin, shyǵarmashylyq erkindigin, jaýapkershiligin arttyrýdy basty nazarda ustaýymyz kerek dep bilemin. Sol siiaqty Ulttyq ǵylymi keńesterdiń fýnktsiialary, quqyqtary men múmkindikteri tek zań normalarymen ǵana belgilengeni jón. Onsyz «biýrokratizm» menen «jeke múddeni kózdeýshilikten» aryla almaimyz. Ony toqtatý qajet. Búgingi tańda ǵalymdardyń jii aityp júrgeni de osy», - dedi ol ǵylym jónindegi zań jobasy talqylanǵan Senat otyrysynda.
Baqytjan Jumaǵulov sonymen qatar nazar aýdarar taǵy bir másele jaily sóz qozǵady.
«Kezinde Qazaqstan ǵylymynyń bedelin kóterý úshin ǵylymi maqalalardy sheteldik basylymdarda jariialaýǵa basym baǵyt berdik. Ǵylymi maqalalardyń sanyn arttyrýǵa tyrystyq. Árine, bul baǵytta jetistikterimiz de joq emes. Alaida kemshilikter de bar. Búgingi tańda ǵalymdardyń eńbegin baǵalaý tek qana osy kriteriige bailanyp qaldy. Osynyń saldarynan qomaqty qarjy jáne uzaq ýaqyt salyp, ǵylymi maqalalardy batys basylymdaryna «tyqpalap» jariialaý qalyptasty. Bul Qazaqstannyń ǵana emes, búkil postkeńestik respýblikalardyń ǵylymi ideialary men qarjylary deldaldardyń paidasyna jumys jasap jatyr degen sóz. Ony – urlaýmen para-par dep túsinemin. Al biz bolsaq, ózimizdiń otandyq ǵylymi jýrnaldardy esepke almaityn boldyq. Osylai óz jýrnaldarymyzdyń quny ketti. Endi ýaqyt ozdyrýǵa bolmaidy. Taiaý arada bul máseleni sheshken jón. Olai bolmaǵan jaǵdaida, qazaqstandyq ǵalymdar baiaǵy Keńes odaǵy tusyndaǵy sekildi endi batystyq júieniń kóleńkesinde qala beredi», - dedi ol.
