Ǵasyrǵa jýyq tarihy bar elimizdiń bas ádebi basylymdarynyń biri - "Juldyz" jýrnalynda rebrending boldy, dep habarlaidy "Ult aqparat" QJO basqarma tóraǵasynyń birinshi orynbasary Aqberen Elgezekke silteme jasap. Bul aqparatty belgili aqyn feisbýktaǵy paraqshasynda bólisti.
«Juldyz» jýrnalynyń ataýy latyn qarpine kóshti. 2018 jylǵy №6 sanynan bastap jýrnaldyń ataýy latyn qarpimen basylyp, jańa logotippen jáne jańa dizainmen shyǵyp jatyr. Bul rebrending tek logotip pen dizainǵa ǵana qatysty emes, mazmundyq, taqyryptyq turǵydan da jańarady degen sóz.Qazaqstan Jazýshylar odaǵyna qarasty 90 jyldyq tarihy bar jýrnaldyń qazaq mádenieti men ádebietine, ónerine sińirgen eńbegi ólsheýsiz. «Juldyz» jýrnaly qazaq pýblitsistikasynyń bastaýynda turǵan «Sholpan», «Tań» jýrnaldarynyń izbasary. Ár jyldary «Jańa ádebiet», «Jyl qusy», «Ádebiet maidany», «Maidan», «Ádebiet jáne iskýsstvo» degen ataýlarmen shyǵyp turǵan.
Jýrnaldyń alǵashqy redaktory qazaqtyń birtýar aqyny Sáken Seifýllin bolǵan. Sapaly ári mazmundy basylym deńgeiine kóterilýine qazaq ádebietiniń klassikteri B.Mailin, I.Jansúgirov, M.Áýezov, S.Muqanov, M.Maǵaýin jáne t.b. qalamgerler kóp eńbek sińirgen.
Bir ǵasyrǵa jýyq ýaqyttan beri ádebietimizdiń shejireshisine ainalǵan «Juldyz» endi mine, jańasha dizainǵa, jańasha mazmunǵa kóship rýhani jańara tústi. BAQ-nyń ishinde alǵashqylarynyń biri bolyp latyn qarpine kóshýdi bastaǵanynyń ózi qoǵamnyń damý úderisin únemi baqylaýda ustap, jas býynǵa ónege kórsete alatyn jýrnal ekendiginiń kórinisi.
Ai saiyn mazmundy maqalalar men shuraily kórkem týyndylardy oqyp otyrǵylaryńyz kelse, barshańyzdy «Juldyz» jýrnalyna jazylýǵa shaqyramyz!" – deidi Aqberen Elgezek óz jazbasynda.
Ult portaly kelbeti men mazmuny jańarǵan qabyrǵaly basylym ujymynyń aldaǵy jumystaryna sáttilik hám shyǵarmashylyq shabyt tileidi!
