Foto: Ertenmedia.kz
Eks-prezidenttiń nemere inisi, atyshýly Qairat Satybaldynyń taǵy bir áieli Asyljan Esenqyzy otbasylyq ómirindegi aýyr jaǵdaidy jariia etti. Bul týraly Ertenmedia.kz basylymy jazdy.
«Báse» arnasymen suhbattasqan Asyljan óziniń «toqal» emesin, Satybaldynyń azamattyq nekedegi áieli bolǵanyn jetkizipti. Aitýynsha, eks-elbasy olardyń qarym-qatynasynan habardar bolǵan, otbasylyq sharalarda birge kórgen.
«Men oǵan aqsha úshin turmysqa shyqpadym. Qairat maǵan Frantsiia, Túrkiia jáne basqa elderden óte qymbat villa syilaǵysy keldi. Biraq men bas tarttym. Ortaq balamyzdyń dúniege kelýi de onyń qalaýy bolatyn. Men birneshe jyl boiy ony jaqsy tanyp-bilý úshin júktilikten saqtanyp júrdim», – deidi Asyljan.
Biraq júkti kezinde-aq olardyń araqatynasy buzyla bastaǵan. Qairat Satybaldy áieline psihologiialyq qysym kórsetip qana qoimai, oǵan birneshe ret qol kótergen.
«Júktiligimniń ekinshi jartysynda ol meni aiaýsyz uryp-soqty. Birde ol meniń ishimnen urdy. Sol kezde ol basqa bir áielmen aralasyp júrgenin keiin bildim. Tipti aýrýhanaǵa túsip, dárigerler maǵan infektsiia juqtyrylǵanyn aitty», – deidi ol.
Osyndai zorlyq-zombylyq pen stress saldarynan qyzy Imanjan aýyr jaǵdaida dúniege kelgen. Oǵan qoiylǵan negizgi diagnozdar: aýtizm, SDVG, disleksiia, sóileýdiń damýynyń keshigýi jáne epilepsiia.
Asyljannyń sózinshe, Qairat Satybaldy balasy dúniege kelgen soń qyzyna alty ai ǵana nazar aýdarǵan, keiin múldem aralaspai ketken. 2021 jyly balaǵa naqty diagnoz qoiylǵaly beri Satybaldy eshbir em-sharaǵa aralaspaǵan, onyń densaýlyǵyna bailanysty máselelerdi elemegen. Tipti sot oryndaýshylarymen birigip, tabysyn jasyryp, alimentti azaitý úshin túrli amalǵa barǵan.
«Satybaldy meniń jáne balamnyń jalǵyz baspanasyn zańsyz tartyp alýǵa árekettendi. Páterdi satýǵa meniń ruqsatym alynbady, barlyq qujattar zańsyz rásimdelgen. Múlikti memlekettik organdarǵa berip, túrmeden merziminen erte shyǵý úshin para retinde paidalanǵanyna senimdimin», – deidi ol.
Onyń sózinshe, qazirgi tańda ol erekshe bala tárbielep otyrǵan jalǵyzbasty ana retinde óte aýyr jaǵdaida qalǵan. Jumys istei almaidy, óitkeni balasyna táýlik boiy kútim kerek. Osy ýaqytqa deiin olarǵa otbasynyń jaqyn dosy Andrei Lobachevskii qarjylai kómek kórsetken, alaida Asyljan quqyqtaryn qorǵaý úshin belsendi kúres bastaǵan soń, bul kómek te toqtaǵan. Sonyń saldarynan erekshe qajettilikteri bar bala birneshe kún boiy ash qalǵan kúnder bolǵan.
«Men politsiiaǵa, prokýratýraǵa, sotqa shaǵymdandym. Biraq eshkim qulaq asqan joq. Kerisinshe, meniń ózimdi qorqytyp, sońymnan baqylaý ornatyp, maǵan qarsy jasandy ister qozǵap, qysym kórsetti. Balam ekeýmiz áli kúnge deiin moraldyq jáne áleýmettik turǵyda óte aýyr kúidemiz», – deidi Asyljan.
Ol bilikke, onyń ishinde prezident Toqaevqa, Nazarbaevtyń jaqyndaryna úndeý jasap, erekshe bala ósirip otyrǵan analardyń quqyǵyn qorǵaityn arnaiy zań qabyldaýdy talap etti.
Sonymen qatar, ol Qairat Satybaldyny osy áreketteri úshin jaýapqa tartýdy surap otyr.
«Men buǵan tózimdilikpen qaraýǵa tyrystym, eshqandai ataq-dańq nemese bailyqty kózdemeimin. Biraq ádiletsizdikke únsiz qarap otyra almaimyn. Balamnyń bolashaǵy úshin aiaǵyna deiin baramyn», – dep sózin qorytty Asyljan Esenqyzy.
