Foto: Freepik.com
Qazaqstanda ana men bala densaýlyǵyn qorǵaý júiesine tsifrlyq jańashyldyqtar kezeń-kezeńimen engizilýde. Sonyń biri – júkti áielderge aldyn ala meditsinalyq tekserýler men skriningter týraly habarlama jiberý servisi, dep habarlaidy Ult.kz.
Qazirdiń ózinde bolashaq analarǵa 348 myńnan astam proaktivti habarlama joldandy. Bul mańyzdy tekserýlerdi ýaqytynda ótýge múmkindik berip, prenataldyq kómekti qoljetimdi etedi.
Tsifrlandyrý tek júkti áielderge ǵana emes, balalar densaýlyǵyn baqylaýǵa da baǵyttalǵan. Elde «Bala densaýlyǵy pasporty» engizilip, ol balabaqsha men mektepke qabyldaný kezinde qajet bolady. Sonymen qatar, 18 jasqa deiingi árbir balanyń tsifrlyq beiini qalyptastyrylyp jatyr. Onda dene salmaǵy indeksi, vaktsinatsiialaý mártebesi, patronattyq saparlar men profilaktikalyq tekserýler týraly derekter tirkeledi. Bul júie balanyń damý qarqynyn baqylaýǵa múmkindik beredi.
Júktilik pen bosanýdan keiingi kezeńde meditsinalyq qyzmetkerlerdiń ózara árekettestigin jeńildetetin elektrondy karta da iske qosylǵan. Ol esepke alýdy, baǵyttaýdy jáne baqylaýdy jeńildetedi.
Bul bastamalar – ana men bala densaýlyǵyna memlekettiń erekshe kóńil bólip otyrǵanynyń kórinisi. Tsifrlyq quraldar meditsinalyq kómektiń sapasy men qoljetimdiligin arttyrýǵa baǵyttalǵan.
