Keńes Odaǵynyń batyry, dańqty qolbasshy Baýyrjan Momyshulynyń 110 jyldyǵyna orai týǵan óńiri Jambyl oblysy Jýaly aýdanynda keńinen atalyp ótti, dep habarlaidy "Ult aqparat".
Tulǵanyń mereitoiy óziniń týyp-ósken Jýaly jerinde atalyp ótti. Mereitoi sharalary B.Momyshuly aýylyndaǵy batyr eskertkishine gúl shoǵyn qoiyp, rýhyna taǵzym etýden bastaldy.
Budan soń Baýyrjan Momyshulynyń kindik qany tamǵan tamǵan Myńbulaq óńirindegi Momysh bulaǵynyń basynda batyrdyń árýaǵyna arnap quran oqyldy. Demeýshilerdiń kómegimen bulaq basyna baratyn bir shaqyrymǵa jýyq jolǵa shaǵaltas tóselip tegisteldi. Bulaq basy qorshalyp, sán aǵashtary otyrǵyzylǵan. Arnaiy boi kótergen stelanyń ashylý saltany ótti.
Sharaǵa QR Sybailas jemqorlyqqa qarsy agenttiginiń Jambyl oblysy boiynsha departamentiniń basshysy Ádilhan Áshirbaev, aýdan basshylary men ardagerler uiymdary men jurtshylyq ókilderi qatysty.
«Jýaly» meshitiniń imamy Seiitqazy qajy Medetbek Quran aiattaryn oqydy. Aýdannyń qadirmendi aqsaqaly, Momysh bulaǵynyń kútimge alynyp, kórkeiýine eńbek sińirgen Amanjol qajy Dúráliuly kópshilikke aq batasyn berdi.
Sondai-aq, Jýaly aýdan aýmaǵynda ornalasqan QR Ulttyq qaýipsizdik komiteti Shekara qyzmetiniń Jambyl oblystyq departamentine qarasty Baýyrjan Momyshuly atyndaǵy shekara bólimshesinde batyr biýstiniń ashylýy saltanaty ótti.
Shekara bólimshesiniń jeke quramy merekelik sapqa turǵyzylyp, Memlekettik Ánuran shyrqaldy.
Jambyl oblysy ákiminiń orynbasary Talǵat Mamaev, Jýaly aýdanynyń ákimi Narbai Ergebekov, Shekara qyzmeti Jambyl oblystyq departamentiniń basqarma bastyǵy Qanatbek Tynybekov shekarashylar men jiylǵan jurtshylyqty osynaý mańyzy tereń qýanyshty oqiǵamen quttyqtai otyryp, izgi lebizin bildirdi.
Batyr biýstiniń lentasyn Talǵat Mamaev pen aýdandyq ardagerler keńesiniń tóraǵasy Estemes Amanbekov kesti. Tulǵanyń mereitoiyna orai aýdanda ózge de is-sharalar uiymdastyryldy.
