Qazaqstanda ózderin oppozitsiialyq partiia retinde ataityn "Jalpyulttyq sotsial demokratiialyq partiia" quryltai jiynyn ótkizip, 9 maýsymda ótetin prezident sailaýyna boikot jariialady, dep habardlaidy Azattyq.
26 sáýirde ótken sezde sóilegen partiia músheleriniń bári bilikti "sailaýda daýys urlaidy" dep aiyptap, sailaýǵa boikot jariialaýdy usyndy.
Qatysýshylardyń biri "JSDP saiasi keńesi prezident sailaýyna úmitker retinde usynǵan jýrnalist Ermurat Bapidi qoldaimyz. Biraq bizdegi sailaý - qýyrshaqtar qatysatyn naýqan. Sondyqtan sailaýǵa boikot jariialap, parlament sailaýyna daiyndalaiyq" dedi.
Munan soń sóilegen "Dat" gazetter jobasynyń jetekshisi, jýrnalist Ermurat Bapi "aýyr bolsa da, úmitker bolýdan bas tartatynyn" aitty.
- "Prezident sailaýyna qatysýdyń qajeti bar ma ózi?" dep oiladym. [...] Men sailaýǵa qatyssam, qýyrshaq qana bolamyn. Kóptiń birine ainalamyn. Memlekettik qyzmette tájiribem de jetkiliksiz. [...] Baǵdarlamamdy oqyp, ýaqyt joǵaltqym kelmeidi. Bári belgili ǵoi. Qiyn, árine. Biraq sezd pikirimen sanasamyn. Kandidatýramnan bas tartamyn. Senim bildirgenderińizge raqmet, - dedi Bapi.
Jýrnalist sóz sóilep bitken soń partiia tóraǵasy Jarmahan Tuiaqbai mikrofondy aldy. Biraq sezd qatysýshylarynyń biri ortaǵa shyqty da, sailaýǵa boikot jariialaýǵa qarsy shyqty.
Artynsha Bapi minberge shyǵyp, úmitker bolýǵa túsýden qaita bas tarty.
- Men sailaýǵa túsýden qoryqpaimyn. [...] Biraq alda parlament sailaýy kele jatyr. Resýrstarymyzdy soǵan saqtaýymyz kerek. Sizderdi de qoldaimyn. Biraq myna aqymaq júiede sailaýǵa qatyspaimyn. Kandidatýramdy alyp tastaimyn, - dedi Ermurat Bapi.
Munan soń Tuiaqbai boikot jariialaý máselesin daýysqa saldy. 36 sezd qatysýshysy - qoldap, úsheýi qarsy daýys berdi.
Qazaqstanda kezekten tys prezident sailaýy 9 maýsymǵa belgilengen. Kandidattardy usyný 28 sáýirde, tirkeý 11 mamyrda aiaqtalady.
Qazirge deiin saiasi partiialar men qoǵamdyq birlestikterden usynylǵan kandidattar:
- Sádibek Túgel - "Uly dala qyrandary" respýblikalyq qozǵalysy (til emtihanynan ótti);
- Qasym-Jomart Toqaev - "Nur Otan" partiiasy (til emtihanynan ótti);
- Amangeldi Taspihov - Qazaqstan kásipodaqtar federatsiiasy (OSK-ǵa qujattaryn tapsyrdy);
- Daniia Espaeva - "Aq jol" partiiasy.
- Tóleýtai Raqymbekov - "Aýyl" partiiasy.
- Jambyl Ahmetbekov - Qazaqstan halyqtyq kommýnistik partiiasy.
