Álemdik qoǵamdastyqtyń Joshy hannyń qazaq jerinde jerlenýin bilmeýi bizdiń úlken kemshiligimiz. Mundai pikirdi búgin Úkimet úiinde ótken baspasóz máslihatynda QR Mádeniet jáne sport ministri Arystanbek Muhamediuly bildirdi, dep habarlaidy QazAqparat.
«Men úshin Altai Qazaqstannyń biregei marjany sanalady. Nikolai Rerih te Shambala taýly Altaida turǵandyǵyn aitqan edi. Dál osy jait úlken qyzyǵýshylyq týdyrdy. Ótken jyly biz onyń sýret kórmesin ótkizdik. Onyń jumystarynyń kópshiligi Shyǵys Qazaqstandaǵy qasietti jerlerge arnalǵan», - dedi Arystanbek Muhamediuly.
Sonymen qatar ol álemdik qaýymdastyq bilip, tanýy tiis Qazaqstandaǵy qasietti oryndardyń biri retinde Ulytaýdy atady.
«Onda Joshyhannyń mavzoleii bar. Sheteldik kelýshilerge Joshy han mazaryn kórsetkende olar tań qalady. Shyńǵys hannyń úlken ulynyń Qazaqstanda jerlenýi búkil álemde zor qyzyǵýshylyq týdyrady. Al muny álemdik qoǵamdastyqtyń bilmeýi bizdiń úlken kemshiligimiz», - dedi ministr.
Onyń atap ótýinshe, qazirgi ýaqytta elimizdegi týristik salany damytýǵa iri halyqaralyq investorlar da qyzyǵýshylyq tanytýda.
«Máselen, Memleket basshysy taiaýda AQSh-qa jasaǵan sapary barysynda Gollivýdtaǵy amerikalyq kinoindýstriia basshylarymen kezdesti. Olar Qazaqstanda jumys isteýge airyqsha qyzyǵýshylyq tanytyp otyr», - dedi ol.
