Doktorant daiyndaý litsenziiasy bar 80 JOO-nyń 54-inde ǵana dissertatsiialyq keńes qurylǵan, dep habarlaidy QazAqparat.
Bilim jáne ǵylym ministrliginiń Bilim jáne ǵylym salasyndaǵy baqylaý komitetiniń tóraiymy Gúlzat Kóbenova dissertatsiialyq keńes pen dissertatsiia qorǵaý erejelerine engen ózgerister týraly baiandady.
«Budan bylai dissertatsiialyq keńesti ashý kezinde joǵary oqý ornynda tiisti litsenziianyń bolýy jetkiliksiz. Búginge deiin osyndai talap qana qoiylyp kelgen. Endi JOO-nyń bazasynda bilim berý baǵdarlamalarynyń tizimine engen, saraptamadan ótken, akkredittelgen PhD baǵdarlamasy bolýy kerek. Sondai-aq, ol baǵdarlama boiynsha maman daiarlaýǵa jyl saiynǵy memlekettik tapsyrysy bar bolýy tiis», - dedi komitet basshysy.
Onyń aitýynsha, qazirgi tańda 80-nen astam JOO-da doktorant daiyndaý litsenziiasy bar bolǵanymen, tek 54-inde ǵana dissertatsiialyq keńes jumys isteidi. Komitet tóraiymy jańa norma dissertatsiialyq keńes neǵurlym daiyndyǵy joǵary JOO-larda ǵana qurylýyna jol ashatynyn aitady.
«Buǵan deiin dissertatsiialyq keńes quramy 3 jylǵa taǵaiyndalyp, turaqty negizdi jumys istep keldi. Endi onyń quramy áldeqaida ikemdi bolyp, 50 paiyzy turaqty, 50 paiyzy ýaqytsha múshelerge bólinedi. Turaqty múshelerdi JOO-nyń ǵylymi keńesi taǵaiyndaidy. Al ýaqytsha músheler doktoranttyń qorǵaityn taqybyryna sáikes jeke-jeke taǵaiyndalady. Bul dissertatsiianyń ádiletti baǵalanýyna múmkindik beredi», - dedi Gúlzat Kóbenova.
Ministrlik ókili buǵan deiin doktorlyq dissertatsiia qorǵaý úshin úmitkerler eńbegin birneshe ret talqylaýdan ótkizip, tipti keide aqyly negizde talqylaý uiymdastyrýǵa májbúr bolǵanyn eske aldy.
«Doktoranttar dissertatsiiasyn qorǵaý úshin birneshe talqylaý satysynan ótýi kerek bolǵan. Tipti keide aqyly negizde talqylaýdan ótken jaittar da bolǵany jasyryn emes. Endi buǵan jol berilmeidi. Doktorant talqylaýdan kafedranyń keńeitilgen otyrysynda bir-aq ret ótedi. Dissertatsiiaǵa qatysty pikirlerdiń bári qorǵaý kezinde ǵana aitylady. Bul doktorantty qorǵaý aldyndaǵy basy artyq júktemeden bosatyp, dissertatsiialyq keńestiń baǵalaý kezindegi jaýapkershiligin arttyrady», - dedi komitet basshysy.
