Ýniversitetter jan basyna qarjylandyrýǵa bólingen aqshanyń 50 paiyzyn oqytýshylardyń jalaqysyna jumsaýy tiis. Bul týraly QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Memleket basshysy Qasym-Jomart Toqaev mamyr aiynda Ulttyq qoǵamdyq senim keńesiniń otyrysynda oqytýshylardyń jalaqysyn kóterý boiynsha naqty tapsyrma bergen bolatyn. Bul tapsyrma naqty qarjymen bekitildi. Sondyqtan osy jumysty odan ary jalǵastyrýymyz kerek. Pedagogikalyq mamandyqta oqityn stýdentterdiń shákirtaqysyn kóterý tapsyrmasy oryndaldy. Shekti balldy kóterý men doktoranttardyń shákirtaqysyn arttyrý tapsyrmasyn da oryndadyq dep aita alamyz. Eń bastysy, bul - deklarativti tapsyrma emes. Óitkeni naqty qarajatpen qamtamasyz etilgen», - dedi ministr vedomstvonyń apparat jinalysynda.
Onyń aitýynsha, oqytýshylardyń jalaqysyn kóterý júieli túrde júrgizilýi tiis.
«Jan basyna qarjylandyrý ádistemesi bar. Sol ádistemege ózgeris engizetin bolamyz. Tapsyrma berdim. Ádistemege «Bilim jáne ǵylym ministrligine qarasty vedomstvolyq ýniversitetter jan basyna qarjylandyrýǵa berilgen qarajattyń kem degende 50 paiyzyn jalaqyǵa jumsaý kerek» degen norma engizip jatyrmyz. Óitkeni, bilim sapasyn kóteremiz desek, onda onyń eń basty sharty - oqytýshylardyń jalaqysy. Sondyqtan bul másele ary qarai da bizdiń derbes baqylaýymyzda bolady», - dedi Ashat Aimaǵambetov.
Ministrdiń dereginshe, 2019 jyldyń tamyzymen salystyrǵanda qazirgi ýaqytta oqytýshylardyń jalaqysy 40-50 paiyzǵa ósken.
