Almatyda joǵary oqý oryndary men ǵylymi-zertteý institýttarynyń forýmy ótti. Shara barysynda bilim men ǵylym integratsiiasy máseleleri talqylanyp, yntymaqtastyq týraly kelisimge qol qoiyldy, dep habarlaidy QazAqparat.
Aýqymdy sharaǵa QR Bilim jáne ǵylym ministri Ashat Aimaǵambetov, ál-Farabi atyndaǵy QazUÝ-dyń rektory Janseiit Túimebaev, QR BǴM ǴK Filosofiia, saiasattaný jáne dintaný institýtynyń bas direktory Serik Seidýmanov jáne ózge de joǵary oqý oryndary, ǵylymi-zertteý institýttarynyń basshylary men ǵylymi qoǵamdastyq ókilderi qatysty.
QR Bilim jáne ǵylym ministri Ashat Aimaǵambetovtyń aitýynsha, búgingi kúni elimizdegi búkil ǵylymi institýttar men joǵary oqý oryndarynyń birlesken jumysyn júrgizý mindeti tur,
«Álemdik tájiribe kórsetip otyrǵandai, kóshbasshy elder bilim men ǵylymdy tiimdi biriktire aldy. Qazaqstanda da mundai tájiribe bar, bizdiń birqatar ǵylymi uiymdar joǵary oqý oryndarymen ózara tabysty jumys isteýde. Mysaly, ál-Farabi atyndaǵy Qazaq ulttyq ýniversiteti men Biologiialyq qaýipsizdik problemalary institýty virýsologiia boiynsha jańa bilim baǵdarlamasyn ázirledi, birlesken dissertatsiialyq keńes ashyp, kadr daiarlaýdy bastap ketti. Bizdiń aldymyzda elimizdegi barlyq ǵylymi institýttar men joǵary oqý oryndarynyń birlesken jumysyn júrgizý mindeti tur, osy maqsatta búgin yntymaqtastyq týraly memorandýmdarǵa qol qoiylady», – dedi ol.
Ministr biyl joǵary oqý oryndary men ǵylymi-zertteý institýttary maman daiyndaýǵa qajetti 500-den astam bilim baǵdarlamasyn ázirleitinin aitty.
Bul ǵylymi zertteý nátijelerin bilim berý baǵdarlamalarynda paidalanýǵa múmkindik beredi.
Sondai-aq stýdenttermen sońǵy ǵylymi jetistiktermen bólisý maqsatynda ǵylymi-zertteý institýttarynyń 300-den astam ǵalymy joǵary oqý oryndarynda dáris oqý, sabaq berý, ǵylymi jumystar men dissertatsiialarǵa jetekshilik etip, retsenziia jazý jumystaryna tartylady.
Budan bólek, birlese maman daiyndaý úshin ǵylymi-zertteý institýttarynyń zerthanalary magistranttar men doktoranttarǵa, al oqý oryndarynyń zerthanalary institýt qyzmetkerlerine qoljetimdi bolady.
«Olar Ulttyq iadrolyq ortalyq, Iadrolyq fizika institýty, Ulttyq biotehnologiia ortalyǵy, Biologiialyq qaýipsizdik institýty jáne taǵy da basqa biregei ǵylymi zerthanalarda jumys istep, taǵylymdamadan óte alady.Sonymen qatar 100-den astam dissertatsiialyq keńes qurý josparlanǵan. Jalpy, bilim men ǵylym integratsiiasy kúsheitilip, ǵylymi-zertteý qyzmetiniń nátijelerin kommertsiialandyrý tetigi jandanady», - dedi Ashat Aimaǵambetov.
Sondai-aq forým aiasynda ýniversitetter men ǵylymi-zertteý institýttary arasynda bilim jáne ǵylym yqpaldastyǵyn nyǵaitý týraly kelisimderge saltanatty túrde qol qoiý rásimi ótti.
Ál-Farabi atyndaǵy QazUÝ «Ǵylym ordasy» respýblikalyq memlekettik kásiporny jáne 16 ǵylymi-zertteý institýtymen yntymaqtastyq týraly kelisimshart jasasty.
Olardyń qatarynda Shoqan Ýálihanov atyndaǵy tarih jáne etnologiia institýty, Matematika jáne matematikalyq modeldeý institýty, Filosofiia, saiasattaný jáne dintaný institýty, Ahmet Baitursynov atyndaǵy til bilimi institýty jáne ózge de ǵylymi institýttar bar.
