Elbasynyń tegin tehnikalyq jáne kásiptik bilim berýdi engizý týraly óte mańyzdy tapsyrmasy tiimsiz júzege asyrylýda. Bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Tehnikalyq jáne kásiptik bilim berý syn kótermeidi jáne jumys berýshilerdiń de, stýdentterdiń de senimsizdigin týdyrady. Jastardyń tehnikalyq jáne kásiptik bilim berýmen qamtylýy nebári 17 paiyzdy ǵana quraidy. Elbasynyń tegin tehnikalyq jáne kásiptik bilim berýdi engizý týraly óte mańyzdy tapsyrmasy tiimsiz júzege asyrylýda. Dýaldy oqytý da barynsha qarqyndy damyp otyrǵan joq. Stýdentterdiń tájiribesi jii formaldy túrde uiymdastyrylady», - dedi Eraly Toǵjanov pedagogtar men bilim jáne ǵylym salasy qyzmetkerleriniń respýblikalyq tamyz keńesi barysynda.
Osy rette Úkimet basshysynyń orynbasary tehnikalyq jáne kásiptik bilim berýdi damytý boiynsha túbegeili sheshimder qabyldaý qajettigin aitty.
«Jas maman» jobasy da úlken olqylyqtarmen júzege asyrylyp jatyr. Jastardy jumyspen qamtý jáne ekonomikany ártaraptandyrý úshin kásiptik jáne tehnikalyq bilim berýdi damytý boiynsha túbegeili sheshimder qabyldaýdy ótinemin. Ulttyq biliktilik júiesi aiasynda beiresmi bilim berýdiń barlyq nusqasyn belsendi engizý qajet. Bul óte mańyzdy másele. Sondyqtan beiresmi bilim berýdiń barlyq nusqasyn jan-jaqty engizgen jón», - dedi Eraly Toǵjanov.
Onyń atap ótýinshe, Ekonomikalyq yntymaqtastyq jáne damý uiymynyń málimetterine sáikes, elimizdegi joǵary bilim berý júiesi osy deńgeide dami beretin bolsa, onda 25 jyldan keiin Qazaqstannyń eresek turǵyndarynyń 10 paiyzy oqý jáne matematikalyq saýattylyq daǵdylarynan aiyrylady.
«Negizinen joǵary oqý oryndary basshylarynyń tiimsiz menedjmenti saldarynan joǵary bilim sapasynyń tómendep bara jatqandyǵyn baiqaimyz. Sondyqtan jastar shetelde bilim alýdy qalaidy. Ýniversitetter jumysynyń basty ustanymy - zertteý arqyly oqytý oryndalmaidy. JOO-lardyń ǵylymi-zertteý jumystary óte álsiz deńgeide uiymdastyrylady. Tolyqtai alǵanda, bilim berý júiesinde bizdiń bilim berýimiz básekelestik deńgeige shyǵyp, sapaly bilimdi qamtamasyz etýi úshin júieli sharalar qabyldaý qajet», - dedi Premer-Ministrdiń orynbasary.
