Tarazda Qazaqstan Táýelsizdiginiń 30 jyldyǵyna orai «Rýhani jańǵyrý» baǵdarlamasy aiasynda «Jomart Túlek-2021» kezdesýi ótti, dep habarlaidy "Ult aqparat".
Sharaǵa qonaq retinde oblystaǵy mektep túlekteri – qazirgi tańda óńirdiń atyn shyǵaryp júrgen belgili qoǵam qairatkerleri, tanymal ánshi-sazgerler, sportshylar, ǵalymdar, kásipkerler qatysty. Kezdesýdi ashqan Jambyl oblysynyń ákimi Berdibek Saparbaev bul júzdesýdiń mán-mańyzdylyǵyna toqtaldy.
«Basty maqsat – elimizge belgili túrli salada jemisti eńbek etip júrgen túlekterdiń tabysty ómir jolyn jas urpaqqa úlgi etý, tanymal jambyldyqtardyń týǵan ólkesiniń áleýmettik máselelerin sheshýge atsalysýǵa tarta otyryp, áleýmettik bastamalardy júzege asyrý jolyndaǵy ómirlik tájiribelerimen bólisý jáne áleýmettik mańyzdy jobalardy júzege asyrý bolyp tabylady. «Jomart túlek» jobasy aiasynda jambyl-tylek.kz. saity iske qosylǵan desek, qazir oǵan 80 myńǵa jýyq túlek tirkelgen. Sońǵy bes jyl ishinde bizdiń túlekter týǵan mektebine, aýylyna jalpy somasy 2 milliard teńge kóleminde demeýshilik kómek kórsetti. «Týǵan jer» jobasy aiasynda 5,5 milliard teńge somasyna 30-dan astam áleýmettik jobany iske asyrý usynylýda»,-dedi oblys ákimi.
San salada el damýyna súbeli úles qosyp júrgen tanymal túlekter jetistikke jetý tájiribesimen jáne týǵan aýyldary týraly estelikterimen bólisti. Olardyń birqatary arnaiy kelip qatyssa, keibireýleri beine-bailanys arqyly qosyldy.
Qonaqtardyń qatarynda Qazaqstannyń Eńbek Eri, KSRO-nyń Halyq ártisi, teatr jáne kino akteri, rejisseri, pedagog, professor Asanáli Áshimov, tuńǵysh Prezident – Elbasy Keńsesiniń basshysy Mahmud Qasymbekov, memleket jáne qoǵam qairatkeri Ómirbek Baigeldi, memleket jáne qoǵam qairatkeri, ǵalym, jazýshy, akademik Myrzatai Joldasbekov, Halyq Qaharmany Baqytjan Ertaev, Qazaqstannyń Eńbek Eri, Qazaq KSR Halyq aǵartý isiniń
úzdigi Aiagúl Mirazova, Qazaqstannyń Halyq ártisi Altynbek Qorazbaev, «Abai atyndaǵy Qazaq ulttyq pedagogikalyq ýniversiteti» KEAQ direktorlar Keńesiniń tóraǵasy Gúlmira Isimbaeva jáne taǵy basqalar bar.
Mahmud Qasymbekov Qazaqstannyń Tuńǵysh Prezidenti Nursultan Nazarbaevtyń quttyqtaýyn jetkizip, Elbasy Berdibek Saparbaevtyń óńirde qazaqstandyqtardyń patriottyq rýhyn nyǵaitýǵa yqpal etetin osyndai igi sharany ótkizý bastamasyn joǵary baǵalaǵanyn atap ótti.
«Týǵan jerine, halqyna degen súiispenshilikten týǵan osyndai igi is-sharalar patriottyq sezimdi kúsheitip, jas urpaqty tárbieleýge úlken úles qosady. Jambyl oblysynda bastalǵan forým respýblikanyń basqa da oblystarynda óz jalǵasyn tabady dep senemin», - delingen Elbasynyń quttyqtaýynda.
Ataqty akter jáne rejisser Asanáli Áshimov forýmǵa arnaiy qatysyp, is-sharanyń mańyzdylyǵyna toqtaldy.
«Óz týǵan jerin múmkindiginshe dáriptep júrgen barsha jambyldyq túlekterdi biriktirý ideiasy maǵan unady. Men ózim osyndai túlekterdiń qatarynda bolǵanymdy maqtan tutamyn», - dedi Asanáli Áshimov.
Memleket qairatkeri Ómirbek Baigeldi osyndai bastamalyq is-sharany uiymdastyrǵany úshin oblys basshylyǵyna rizashylyǵyn bildirip, bul aldaǵy ýaqytta da dástúrli túrde óz jalǵasyn tabatynyna senim bildirdi.
«Áýlieata topyraǵynan memleketimizdiń qalyptasýy men damýyna orasan zor úles qosqan jáne qosyp kele jatqan kóptegen talantty jáne áigili el azamattar shyqty. Olardyń týǵan jerimen bailanysyn úzbeýi óte mańyzdy.
Birlesken kúsh-jigermen biz Jambyl oblysynyń damýy jolynda kóptegen igi isterdi atqara alatynymyzǵa senimdimin», - dedi Halyq Qaharmany, general-leitenant Baqytjan Ertaev.
Máskeýdegi Lomonosov atyndaǵy Máskeý memlekettik ýniversitetiniń magistranty Bogdan Zagribelnyi, singapýrlyq kásipker Talǵat Turymbaev, sondai-aq AQSh, Túrkiia jáne basqa da elderden qatysýshylar onlain rejiminde bailanysqa shyqty.
Qatysýshylardyń árqaisysy turaqty negizde týǵan mektebine, aýylyna nemese qalasyna qoldan kelgenshe kómek kórsetip júrgender. Olar qajetti qural-jabdyqtar satyp alyp, áleýmettik nysandar salýǵa qarajat bólip, kitaptar syilap otyrady.
Aimaq basshysy kezdesýge qatysýshylardy tyńdap, olarǵa týǵan mekenderi týraly umytpaǵandary, jas jerlesterimen oi bólisip, olardy úlken jetistikterge yntalandyrǵandary úshin alǵys bildirdi. Osynaý urpaqtar sabaqtastyǵy ári qarai da saqtalýy tiis ekenin basa aitty.
Is-shara sońynda qatysýshylarǵa estelik músinsheler alǵys hattar tabystaldy.
