Biz Prezident Joldaýynda jariia etilgen qaǵidalardyń ómirde oryndala bastaitynyna úmit artqymyz keledi. Mundai pikirdi QR Parlamenti Májilisiniń depýtaty Saýytbek Abdrahmanov bildirdi, dep habarlaidy QazAqparat.
«Memleket basshysynyń jyl saiyn kezekti sessiianyń ashylýynda, Parlament palatalarynyń birlesken otyrysynda el halqyna Joldaý jasaýy – talaidan qalyptasqan dástúr. Biyl da solai boldy. Biraq bul eki aralyq, ótken qyrkúiektiń basy men biylǵy qyrkúiektiń basy – bir jyl ǵana ýaqyt aralyǵy emes. Bul aralyqqa tutas bir dáýir syiyp ketkendei kórinedi. Óitkeni, dál osy aralyqta adamzat balasy buryn-sońdy bolyp kórmegen jańa jaǵdaiǵa tap boldy. Dál osy ýaqyt aralyǵynda jahandanýdyń, qanshalyqty jaqsylyqtarymen qatar, óte-móte kúrdeli qubylys ekendigin de kórdik. Bir elde, bir qalada bastalǵan epidemiia az ýaqyttyń ishinde adamzattyq pandemiiaǵa ulasyp júre berdi. Eń myqty ekonomikasy bar elder, meditsinasy eń damyǵan memleketter koronavirýstyń qyspaǵyna shydas bere almady. Adamdar kúnine on myńdap ómirden qoshtasyp jatty», - dedi Májilis depýtaty.
Onyń atap ótýinshe, Qazaqstan da qiyn jaǵdaidy bastan keshirdi.
«Qasym-Jomart Toqaevtyń búgingi Joldaýynda el halqynyń osyndai syn saǵattaǵy judyryqtai jumylǵan birligine razylyq bildirýi de sondyqtan. Qasym-Jomart Kemeluly: «Indetpen kúres dana halqymyzǵa tán asyl qasietterdiń arqasynda júzege asty. Ózgege qol ushyn sozyp, tileýles bolý, tosynnan kelgen keselge qarsy turý mańyzdy ekeni anyq baiqaldy» dep atap aitty. Dárigerlerge, quqyq qorǵaý organdarynyń qyzmetkerlerine, áskeri qyzmetshilerge, eriktilerge, kásipkerlerge jáne osyndai qiyn jaǵdaida beijai qalmaǵan barsha azamattarǵa shyn júrekten alǵysyn jetkizdi.
Qazaqstannyń ekonomikalyq áleýeti milliondaǵan adamǵa, ýaqytsha tabysynan aiyrylǵan azamattarǵa hal-qaderinshe kómek kórsetkendigi de aityldy. Sonymen qatar Qasym-Jomart Kemeluly bul indet sońǵy 100 jyl ishinde dúnie júziniń buryn-sońdy bolyp kórmegen asa kúrdeli álemdik daǵdarysqa ushyraýyna ákep soqtyrǵandyǵyn da atap aitty», - dedi Saýytbek Abdrahmanov.
Májilis depýtatynyń paiymynsha, daǵdarys jaǵdaiynda pandemiianyń zardaptaryn joiý, indettiń ekinshi tolqyny soqqan jaǵdaida jumys isteý úshin elimizge jańa jaǵdaidaǵy jańa ekonomika, jańa jaǵdaidaǵy jańasha basqarý kerek.
«Ol jóninde de Prezident arnaiy toqtalyp ótti. Joldaýdyń úlken bir taraýy memlekettik basqarýdyń jańa modeli tóńireginde boldy. Munda naqty qadamdar da atap kórsetilgen. Strategiialyq josparlaý men reformalar jóninde agenttik qurylatyndyǵy, onyń tikelei Prezidentke baǵyndyrylatyndyǵy jáne ol agenttik memlekettik josparlaýdyń búkil júiesiniń ortalyq býynyna ainalatyndyǵy atap kórsetildi», - dedi depýtat.
Saýytbek Abdrahmanovtyń aitýynsha, pandemiia jaǵdaiynda onlain jumysqa kóshý memlekettik apparatty qysqartýǵa, tipti emin-erkin qysqartýǵa bolatyndyǵyn kórsetip berdi.
«Qasym-Jomart Toqaev budan buryn jariia etken 25 paiyzdyq qysqartýdy 2 jylda aiaqtaýǵa, naqty aitqanda biyl 10 paiyzǵa, kelesi jyly 15 paiyzǵa qysqartýǵa bolatyndyǵyn kórsetip otyr. Sonyń esebinen memlekettik qyzmetshiniń deńgeiin kóterip, materialdyq jaǵdaiyn jaqsartýǵa múmkindik ashylady», - dedi ol.
Májilis depýtaty búgingi Joldaýda óńirlerdiń ekonomikalyq damýyna bailanysty da kóptegen jaqsy oilar aitylǵandyǵyna nazar aýdartady.
«Aýyl sharýashylyǵyn damytpaiynsha, básekege qabiletti ekonomika qurý múmkin emestigi atap kórsetildi. Jerimizdiń, qazaq jeriniń sheteldikterge satylmaityndyǵy da naqty aityldy. Osy sózdiń tusynda, Parlament palatalarynyń birlesken otyrysy ótetin zalda jurttyń dý qol shapalaqtaýy Memleket basshysynyń asa mańyzdy máselege sóz arnaýy oń sheshim bolǵandyǵyn kórsetedi. Árine, birlesken otyrys aiaqtala salysymen, tilshiniń ótinishine orai telefon arqyly aityp jatqan sózderde jańa ǵana jariia etilgen Joldaýdyń mán-mańyzyn, barlyq qyry men syryn qamtyp ótý óte qiyn, tipti ol múmkin de emes. Memleket basshysynyń halyqtyń muń-muqtajyna sonshalyqty sergek qaraityndyǵyna dálel Joldaýda otbasylyq-demografiialyq ahýaldaǵy asa alańdatarlyq jaittyń biri retinde elimizdegi árbir altynshy otbasynyń perzent súie almai otyrǵandyǵyn aitýy der edim. Osyǵan bailanysty «Ańsaǵan sábi» degen arnaýly baǵdarlama jasalatyndyǵy, onyń 2021 jyldan iske qosylatyndyǵy óte qýanyshty jai. Ustazdar, dárigerler jalaqysynyń naqty ósetindigi, atap aitqanda, 2023 jylǵa qarai dárigerler jalaqysynyń ekonomikadaǵy ortasha jalaqydan 2 ese artyq bolatyndyǵy, ekologiiaǵa qaǵidatty túrde jańasha kózqaras qalyptastyrylatyndyǵy, taiaýdaǵy bes jyldyń ishinde orman qorynda 2 mlrd, eldi mekenderde 15 mln túp aǵash otyrǵyzylatyndyǵy elimizdi jasyl jelekke bóleý jóninde úlken is qolǵa alynatyndyǵyn kórsetedi», - dedi Májilis depýtaty.
Halyq qalaýlysynyń aitýynsha, tsifrlandyrýdyń qanshalyqty mańyzdy ekendigin pandemiia anyq kórsetip berdi. Memleket basshysy tsifrlandyrýdy kádimgi joldar men elektr jaryǵy siiaqty negizgi qajettilikter qataryna jatqyzdy.
«Azamattardyń elimizdi basqarýǵa qatysýy týraly oilary da kókeige qonady. Airyqsha atap aitatyn jai – Joldaýda ulttyq jańa bolmys týraly arnaiy sóz etilgendigi. HHI ǵasyrdyń urpaǵy kemel bilimdi bolýy kerektigi, jas býyndy erinbei eńbek etýge beiimdeý qajettigi, kez kelgen isti kásibi daǵdy arqyly júzege asyrý durys bolatyndyǵy, temirdei tártipke, joǵary jaýapkershilikke beiimdelý kerektigi, adaldyqtan, uqyptylyqtan, tiianaqtylyqtan tanbaý kerektigi birinshi, ekinshi, úshinshi dep turyp, sanamalap aityldy. Abai synap aitqan qoǵamdyq dertterden arylý qajettigi de Memleket basshysynyń sózine arqaý bolǵany óte oryndy. Bárimizdiń aldymyzda jańa beles tur. Ol – Táýelsizdiktiń 30 jyldyǵy. Bul beles bizge memlekettiń bolashaǵy úshin zor jaýapkershilik júkteidi. Memleket basshysynyń Joldaýy elimizdiń halqy, kópetnosty memleketimiz jurtshylyǵy Táýelsizdik toiyna, mereili dataǵa jańa zamanǵa laiyqty jańa memleket, jańarǵan ult retinde tolyǵyp, túlep barýǵa umtylady degen senimdi uialatady. Biz Prezident Joldaýynda jariia etilgen qaǵidalardyń ómirde oryndala bastaityndyǵyna úmit artqymyz keledi», – dedi Saýytbek Abdrahmanov.
