Qazaq ulttyq qyzdar pedagogikalyq ýniversitetiniń rektory Gaýhar Aldambergenova Memleket basshysy Qasym-Jomart Toqaevtyń Qazaqstan halqyna arnaǵan biylǵy Joldaýyna qatysty pikir bildirdi, dep habarlaidy QazAqparat.
Onyń paiymdaýynsha, bilim jáne ǵylym salasyna jańa naqty mindetter qoidy. Prezident atap kórsetken basym baǵyttar el ekonomikasynyń basty ózegi sanalatyn atalǵan salalardyń zamanǵa sai damýyna zor serpin beredi.
«Memleket basshysy 2021 jyldyń qańtar aiynan bastap muǵalimderdiń jalaqysyn 25 paiyzǵa kóterý týraly sheshim qabyldady. Belgili bolǵandai, eńbekaqy mólsheri keleshekte de arta bermek. Bul maqsatta aldaǵy úsh jylda qosymsha 1,2 trln teńge bólinbek. Sońǵy jyldary elimizde ustaz bedelin, pedagog mártebesin kóterý jolynda eleýli ister atqarylyp, naqty jumystar júzege asýda. Máselen, bir ǵana «Pedagog mártebesi týraly» Zańnyń qabyldanýy – qazaqstandyq ustazdar qaýymynyń qoǵamdaǵy bedelin arttyryp, ornyn aishyqtaýǵa baǵyttalǵan zor qadam boldy. 21 baptan turatyn jańa Zań jarty millionnan astam ustazdyń jumysyna qatysty. Onda tórt baǵyt qamtylǵan. Birinshiden, pedagogtardyń quqyqtaryn keńeitý jáne ózine tán emes jumystardan bosatý, olardyń júktemesin azaitý. Ekinshiden, muǵalimniń qyzmetine qoiylatyn talaptardy kúsheitý. Úshinshiden, materialdyq emes yntalandyrý tetikteri jáne tórtinshiden, materialdyq yntalandyrý qadamdary. Prezidenttiń búgin jariialaǵan sheshimi osy zań aiasynda qolǵa alynǵanyn atap ótken lázim», – dedi Gaýhar Aldambergenova.
Sonymen qatar, ol ustaz bedeliniń artýy, eńbekaqynyń jyl saiyn kóterilýi – bilikti de bilimdi, «ustaz» degen atqa laiyqty naǵyz mamandar mektebiniń qalyptasýyna negiz bolatynyn atap ótti.
«Búginde muǵalim bedelin arttyrýmen qatar, pedagog kadrlaryn daiarlaityn oqý oryndarynyń da mańyzy aiqyndalýda. Elimizdegi eń irgeli joǵary oqý orny Qazaq ulttyq qyzdar pedagogikalyq ýniversiteti negizinen aýyldyq eldi mekenderdegi bilim oshaqtary úshin maman daiarlaidy. Óziniń 75 jyldyq tól tarihynda oqý orny 60 myńnan astam pedagog daiyndady. Qazirgi kúnde oqý ornynda bolashaq pedagogtardyń kásibi beiimdelýi úshin pedagogikalyq kadrlardy daiarlaýdyń bilim berý baǵdarlamalary tájiribege baǵyttalǵan. Tájiribege baǵyttalýy – birinshi kýrstan tórtinshi kýrsqa deiin tájiribeden ótý arqyly júzege asyrylady. Bul óz kezeginde bolashaq mamandardyń teoriia men tájiribeni utymdy úilestirip, biliktiligin arttyrýǵa zor serpin beredi», – deidi Qyzdar ýniversitetiniń rektory.
Gaýhar Aldambergenova Joldaýda atap kórsetilgen ǵylymi áleýetti damytý men jas ǵalymdardy yntalandyrý – atalǵan salanyń qarqyndy damýyna oń yqpal etetine senimdi.
«Jańalyǵy jelmen jarysqan búgingidei zamanda ǵylym salasyna memleket tarapynan zor kóńil bólinip, eleýli qoldaý kórsetilip kele jatyr. Qazaqstannyń bul taraptaǵy maqsaty – ǵylymnyń damýyna jańa qarqyn berý, onyń damýy úshin durys baǵyttardy qabyldaý jáne otandyq biznestiń ǵylymmen tyǵyz bailanysta bolýyna yqpal etý. Bul oraida elimizde birshama bastamalar qolǵa alyndy. Búgin sonyń birqataryn Prezident naqty atap kórsetti. Atap aitqanda, ǵylymi jobalardy qarjylandyrýǵa memlekettik qazynadan qomaqty qarajat bólinip, jas ǵalymdardyń ǵylymi ideialary jan-jaqty yntalandyrylmaq»,– deidi ol.
Ýniversitet rektory óz sózinde Qazaqstan jas ǵalym-pedagogtary Qaýymdastyǵy týraly da atap ótti.
«Qaýymdastyq elimizdiń pedagog mamandaryn daiyndaityn joǵary oqý oryndarymen birlesip, bilim berý men ǵylym salasyndaǵy bolyp jatqan birqatar bastamalardy iske asyrýǵa atsalysty. Qaýymdastyqtyń negizgi maqsaty – elimizdiń jas pedagog-ǵalymdarynyń dialog alańyn uiymdastyrý, bilim men ǵylymdy ushtastyra otyryp, jastardyń ǵylymi ideialarynyń bilim berý salasyna enýine yqpal jasaý. Atalǵan Qaýymdastyq aldaǵy ýaqytta Prezident Joldaýynda atap kórsetilgen ǵylym salasyn damytýǵa óz úlesin qosatyn bolady», – dedi spiker.
Onyń aitýynsha, jańa myńjyldyqta bilimi men biligi úilesken mamandardyń bási basym bolady. Buny ýaqyttyń ózi aiqyndap otyr.
«Otandyq joǵary oqý oryndarynyń aldynda oi-órisi damyǵan, talantty, zerdeli jáne ultjandy urpaq tárbieleý mindeti tur. Osy oraida Memleket basshysy búgingi Joldaýynda onyń negizgi tetikterin aiqyndady. Prezidenttiń biylǵy Joldaýy biz úshin osynysymen qundy, osynysymen mańyzdy», – dep sózin túiindedi Gaýhar Tóremuratqyzy.
