قازاق ۇلتتىق قىزدار پەداگوگيكالىق ۋنيۆەرسيتەتٸنٸڭ رەكتورى گاۋھار الدامبەرگەنوۆا مەملەكەت باسشىسى قاسىم-جومارت توقاەۆتىڭ قازاقستان حالقىنا ارناعان بيىلعى جولداۋىنا قاتىستى پٸكٸر بٸلدٸردٸ, دەپ حابارلايدى قازاقپارات.
ونىڭ پايىمداۋىنشا, بٸلٸم جەنە عىلىم سالاسىنا جاڭا ناقتى مٸندەتتەر قويدى. پرەزيدەنت اتاپ كٶرسەتكەن باسىم باعىتتار ەل ەكونوميكاسىنىڭ باستى ٶزەگٸ سانالاتىن اتالعان سالالاردىڭ زامانعا ساي دامۋىنا زور سەرپٸن بەرەدٸ.
«مەملەكەت باسشىسى 2021 جىلدىڭ قاڭتار ايىنان باستاپ مۇعالٸمدەردٸڭ جالاقىسىن 25 پايىزعا كٶتەرۋ تۋرالى شەشٸم قابىلدادى. بەلگٸلٸ بولعانداي, ەڭبەكاقى مٶلشەرٸ كەلەشەكتە دە ارتا بەرمەك. بۇل ماقساتتا الداعى ٷش جىلدا قوسىمشا 1,2 ترلن تەڭگە بٶلٸنبەك. سوڭعى جىلدارى ەلٸمٸزدە ۇستاز بەدەلٸن, پەداگوگ مەرتەبەسٸن كٶتەرۋ جولىندا ەلەۋلٸ ٸستەر اتقارىلىپ, ناقتى جۇمىستار جٷزەگە اسۋدا. مەسەلەن, بٸر عانا «پەداگوگ مەرتەبەسٸ تۋرالى» زاڭنىڭ قابىلدانۋى – قازاقستاندىق ۇستازدار قاۋىمىنىڭ قوعامداعى بەدەلٸن ارتتىرىپ, ورنىن ايشىقتاۋعا باعىتتالعان زور قادام بولدى. 21 باپتان تۇراتىن جاڭا زاڭ جارتى ميلليوننان استام ۇستازدىڭ جۇمىسىنا قاتىستى. وندا تٶرت باعىت قامتىلعان. بٸرٸنشٸدەن, پەداگوگتاردىڭ قۇقىقتارىن كەڭەيتۋ جەنە ٶزٸنە تەن ەمەس جۇمىستاردان بوساتۋ, ولاردىڭ جٷكتەمەسٸن ازايتۋ. ەكٸنشٸدەن, مۇعالٸمنٸڭ قىزمەتٸنە قويىلاتىن تالاپتاردى كٷشەيتۋ. ٷشٸنشٸدەن, ماتەريالدىق ەمەس ىنتالاندىرۋ تەتٸكتەرٸ جەنە تٶرتٸنشٸدەن, ماتەريالدىق ىنتالاندىرۋ قادامدارى. پرەزيدەنتتٸڭ بٷگٸن جارييالاعان شەشٸمٸ وسى زاڭ اياسىندا قولعا الىنعانىن اتاپ ٶتكەن لەزٸم», – دەدٸ گاۋھار الدامبەرگەنوۆا.
سونىمەن قاتار, ول ۇستاز بەدەلٸنٸڭ ارتۋى, ەڭبەكاقىنىڭ جىل سايىن كٶتەرٸلۋٸ – بٸلٸكتٸ دە بٸلٸمدٸ, «ۇستاز» دەگەن اتقا لايىقتى ناعىز ماماندار مەكتەبٸنٸڭ قالىپتاسۋىنا نەگٸز بولاتىنىن اتاپ ٶتتٸ.
«بٷگٸندە مۇعالٸم بەدەلٸن ارتتىرۋمەن قاتار, پەداگوگ كادرلارىن دايارلايتىن وقۋ ورىندارىنىڭ دا ماڭىزى ايقىندالۋدا. ەلٸمٸزدەگٸ ەڭ ٸرگەلٸ جوعارى وقۋ ورنى قازاق ۇلتتىق قىزدار پەداگوگيكالىق ۋنيۆەرسيتەتٸ نەگٸزٸنەن اۋىلدىق ەلدٸ مەكەندەردەگٸ بٸلٸم وشاقتارى ٷشٸن مامان دايارلايدى. ٶزٸنٸڭ 75 جىلدىق تٶل تاريحىندا وقۋ ورنى 60 مىڭنان استام پەداگوگ دايىندادى. قازٸرگٸ كٷندە وقۋ ورنىندا بولاشاق پەداگوگتاردىڭ كەسٸبي بەيٸمدەلۋٸ ٷشٸن پەداگوگيكالىق كادرلاردى دايارلاۋدىڭ بٸلٸم بەرۋ باعدارلامالارى تەجٸريبەگە باعىتتالعان. تەجٸريبەگە باعىتتالۋى – بٸرٸنشٸ كۋرستان تٶرتٸنشٸ كۋرسقا دەيٸن تەجٸريبەدەن ٶتۋ ارقىلى جٷزەگە اسىرىلادى. بۇل ٶز كەزەگٸندە بولاشاق مامانداردىڭ تەورييا مەن تەجٸريبەنٸ ۇتىمدى ٷيلەستٸرٸپ, بٸلٸكتٸلٸگٸن ارتتىرۋعا زور سەرپٸن بەرەدٸ», – دەيدٸ قىزدار ۋنيۆەرسيتەتٸنٸڭ رەكتورى.
گاۋھار الدامبەرگەنوۆا جولداۋدا اتاپ كٶرسەتٸلگەن عىلىمي ەلەۋەتتٸ دامىتۋ مەن جاس عالىمداردى ىنتالاندىرۋ – اتالعان سالانىڭ قارقىندى دامۋىنا وڭ ىقپال ەتەتٸنە سەنٸمدٸ.
«جاڭالىعى جەلمەن جارىسقان بٷگٸنگٸدەي زاماندا عىلىم سالاسىنا مەملەكەت تاراپىنان زور كٶڭٸل بٶلٸنٸپ, ەلەۋلٸ قولداۋ كٶرسەتٸلٸپ كەلە جاتىر. قازاقستاننىڭ بۇل تاراپتاعى ماقساتى – عىلىمنىڭ دامۋىنا جاڭا قارقىن بەرۋ, ونىڭ دامۋى ٷشٸن دۇرىس باعىتتاردى قابىلداۋ جەنە وتاندىق بيزنەستٸڭ عىلىممەن تىعىز بايلانىستا بولۋىنا ىقپال ەتۋ. بۇل ورايدا ەلٸمٸزدە بٸرشاما باستامالار قولعا الىندى. بٷگٸن سونىڭ بٸرقاتارىن پرەزيدەنت ناقتى اتاپ كٶرسەتتٸ. اتاپ ايتقاندا, عىلىمي جوبالاردى قارجىلاندىرۋعا مەملەكەتتٸك قازىنادان قوماقتى قاراجات بٶلٸنٸپ, جاس عالىمداردىڭ عىلىمي يدەيالارى جان-جاقتى ىنتالاندىرىلماق»,– دەيدٸ ول.
ۋنيۆەرسيتەت رەكتورى ٶز سٶزٸندە قازاقستان جاس عالىم-پەداگوگتارى قاۋىمداستىعى تۋرالى دا اتاپ ٶتتٸ.
«قاۋىمداستىق ەلٸمٸزدٸڭ پەداگوگ ماماندارىن دايىندايتىن جوعارى وقۋ ورىندارىمەن بٸرلەسٸپ, بٸلٸم بەرۋ مەن عىلىم سالاسىنداعى بولىپ جاتقان بٸرقاتار باستامالاردى ٸسكە اسىرۋعا اتسالىستى. قاۋىمداستىقتىڭ نەگٸزگٸ ماقساتى – ەلٸمٸزدٸڭ جاس پەداگوگ-عالىمدارىنىڭ ديالوگ الاڭىن ۇيىمداستىرۋ, بٸلٸم مەن عىلىمدى ۇشتاستىرا وتىرىپ, جاستاردىڭ عىلىمي يدەيالارىنىڭ بٸلٸم بەرۋ سالاسىنا ەنۋٸنە ىقپال جاساۋ. اتالعان قاۋىمداستىق الداعى ۋاقىتتا پرەزيدەنت جولداۋىندا اتاپ كٶرسەتٸلگەن عىلىم سالاسىن دامىتۋعا ٶز ٷلەسٸن قوساتىن بولادى», – دەدٸ سپيكەر.
ونىڭ ايتۋىنشا, جاڭا مىڭجىلدىقتا بٸلٸمٸ مەن بٸلٸگٸ ٷيلەسكەن مامانداردىڭ بەسٸ باسىم بولادى. بۇنى ۋاقىتتىڭ ٶزٸ ايقىنداپ وتىر.
«وتاندىق جوعارى وقۋ ورىندارىنىڭ الدىندا وي-ٶرٸسٸ دامىعان, تالانتتى, زەردەلٸ جەنە ۇلتجاندى ۇرپاق تەربيەلەۋ مٸندەتٸ تۇر. وسى ورايدا مەملەكەت باسشىسى بٷگٸنگٸ جولداۋىندا ونىڭ نەگٸزگٸ تەتٸكتەرٸن ايقىندادى. پرەزيدەنتتٸڭ بيىلعى جولداۋى بٸز ٷشٸن وسىنىسىمەن قۇندى, وسىنىسىمەن ماڭىزدى», – دەپ سٶزٸن تٷيٸندەدٸ گاۋھار تٶرەمۇراتقىزى.
